നിലമ്പൂര്‍: നഗരത്തിലെ എ.ടി.എമ്മുകള്‍ ഇന്നലെ പൂര്‍ണമായും അടഞ്ഞു കിടന്നു. നിലമ്പൂരില്‍ താഴെ എസ്.ബി.ഐ ബാങ്കിനു സമീപത്തെ എസ്.ബി.ടിയുടെ എ.ടി.എം മാത്രമാണ് ആകെ പ്രവര്‍ത്തിച്ചത്. അതിരാവിലെ മുതല്‍ ഇവിടം വരി നിന്നു. വരി നിലമ്പൂര്‍ ഗവ. മോഡല്‍ യു.പി സ്‌കൂളിനു മുമ്പിലെത്തിയിരുന്നു. ഉച്ചയോടെ പണം നിറച്ചെങ്കിലും നെറ്റ് തകരാര്‍ മൂലം ആര്‍ക്കും പിന്‍വലിക്കാന്‍ സാധിച്ചില്ല.
തകരാര്‍ പരിഹരിക്കാന്‍ ബാങ്ക് അധികൃതര്‍ എത്തിയതുമില്ല. ജനങ്ങള്‍ ബഹളം വെച്ചതോടെ വൈകീട്ട് നാലരയോടെ ബാങ്ക് ജീവനക്കാര്‍ എത്തി തകരാര്‍ പരിഹരിച്ചുവെങ്കിലും ഒരു മണിക്കൂറിനകം പണം തീരന്നു.
ബാങ്കുകളിലും പോസ്റ്റ് ഓഫിസിലും വന്‍ തിരക്കാണ് ഉണ്ടായിരുന്നത്. ഇതുമൂലം പോസ്റ്റ് ഓഫിസിലെ സപീഡ് പോസ്റ്റ് ഉള്‍പ്പെടെ ദൈനംദിന പ്രവര്‍ത്തനങ്ങളും തടസ്സപ്പെട്ടു. സാമ്പത്തിക പ്രതിസന്ധിയെ തുടര്‍ന്ന് രജിസ്ട്രാര്‍ ഓഫിസിന്റെ പ്രവര്‍ത്തനങ്ങളും സ്തംഭിച്ചു.
അതേസമയം പഴയ അസാധുവാക്കപ്പെട്ട നോട്ടുകള്‍ സ്വീകരിച്ചതോടെ ഇന്നലെ വ്യാപാര സ്ഥാപനങ്ങള്‍ക്ക് കച്ചവടം നേരിയ തോതില്‍ വര്‍ധിച്ചു.