നേമം: നേമത്തിനു സമീപം ഇടയ്‌ക്കോട് ഗ്യാസ് സിലിണ്ടര്‍ പൊട്ടിത്തെറിച്ച് വീടിന്റെ അടുക്കള തകര്‍ന്നു. ആളപായമില്ല.
നേമം ഇടയ്‌ക്കോട് ഗീതാഞ്ജലിയില്‍ ഗീതയുടെ വീട്ടിലെ ഗ്യാസ് സിലിണ്ടറാണ് ഇന്നലെ പുലര്‍ച്ചെ നാല് മണിയോടെ പൊട്ടിത്തെറിച്ചത്. സിലിണ്ടര്‍ പൊട്ടിയ ശബ്ദം കേട്ട് ഗീതയും മക്കളും പുറത്തേയ്ക്ക് ഓടിയതിനാല്‍ വന്‍ അപകടം ഒഴിവായി. സിലിണ്ടര്‍ സൂക്ഷിച്ചിരുന്ന അടുക്കള പൂര്‍ണമായും തകര്‍ന്നു.
അടുക്കളയിലുണ്ടായിരുന്ന പാത്രങ്ങള്‍ , ഫ്രിഡ്ജ് തുടങ്ങിയവ കത്തി നശിച്ചു. ടി.വി , ഫര്‍ണിച്ചറുകള്‍ എന്നിവയും നശിച്ചു. കൂടാതെ ജനാലകളുടെ ചില്ലുകള്‍ തകര്‍ന്ന നിലയിലാണ്. ഗ്യാസ് ചോര്‍ന്നതാണ് പൊട്ടിത്തെറിയ്ക്ക് കാരണമെന്നാണ് പ്രാഥമിക നിഗമനം.
ബഹളം കേട്ട് ഓടിയെത്തിയ നാട്ടുകാരാണ് വെളളമൊഴിച്ച് തീ കെടുത്തിയത്. ചെങ്കല്‍ചൂളയില്‍ നിന്നും അഗ്നിരക്ഷാസേനയും രക്ഷാ പ്രവര്‍ത്തനാത്തിനായി എത്തിയിരുന്നു.