ദിസ്പൂര്‍: അസമിലെ തേയില ഫാക്ടറിയില്‍ തൊഴിലാളികള്‍ക്കു ശമ്പളം നല്‍കാനുള്ള പണവുമായി പോയ വാനിനുനേരെ അജ്ഞാതനായ തോക്കുധാരി നടത്തിയ ആക്രമണത്തില്‍ ഒരാള്‍ കൊല്ലപ്പെട്ടു. രണ്ടുപേര്‍ക്കു പരുക്കേറ്റു. അഭിജിത് പോള്‍ ആണു മരിച്ചതെന്നു പൊലിസ് അറിയിച്ചു. പരുക്കേറ്റവരെ ദിബ്രുഗഡിലെ അസം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഇരുവരും തേയിലത്തോട്ടത്തിലെ സുരക്ഷാ ജീവനക്കാരാണ്. അസമിലെ ടിന്‍സുകിയ ജില്ലയിലെ പെന്‍ഗ്രിയയിലെ തേയില തോട്ടത്തിലേക്കു പോവുകയായിരുന്ന വാനിനുനേരെയാണ് ആക്രമണമുണ്ടായത്. തേയിലത്തോട്ടത്തിലെത്താന്‍ വനമേഖലയിലൂടെവേണം കടന്നു പോകാന്‍. ഇവിടെ വച്ചാണ് വാനിനുനേരെ തോക്കുധാരിയുടെ ആക്രമണമുണ്ടായത്.