അഖില്‍ ഷാ
കഠിനംകുളം: നൂറുകണക്കിന് കുടുംബങ്ങളുടെ പുനരധിവാസം നടപ്പിലാക്കാതെ, ഉള്‍നാടന്‍ ജലാഗതാഗതത്തിനു വേണ്ടി പാര്‍വതി പുത്തനാറിന്റെ അതിര്‍ത്തി നിര്‍ണയ സര്‍വേ പുനരാരംഭിക്കാനുള്ള നീക്കത്തിനെതിരെ പ്രതിഷേധം ശക്തം. ആദ്യ ഘട്ടത്തില്‍ കോവളം മുതല്‍ ആക്കുളം വരെയുള്ള 16 കീലോമീറ്ററിലാണ് സര്‍വേ നടത്താന്‍ തീരുമാനിച്ചിരിക്കുന്നത്. രണ്ടാം ഘട്ടത്തില്‍ ഇവിടെ നിന്ന് ചിറയിന്‍കീഴുവരെ സര്‍വേ നടത്തും.
രണ്ടുവര്‍ഷം മുമ്പ് സര്‍വേ ആരംഭിച്ചപ്പോള്‍ പാര്‍വതി പുത്തനാറിന്റെ ഇരുകരയിലെയും പുറമ്പോക്കില്‍ താമസിച്ചിരുന്ന കഠിനംകുളം, മേനംകുളം വില്ലേജുകളില്‍പെട്ട മൂന്നൂറിലധികം കുടുംബങ്ങള്‍ പ്രതിഷേധവുമായി രംഗത്തെത്തിയിരുന്നു.
അതിനെ തുടര്‍ന്ന് പാതിവഴിയില്‍ നിലച്ച സര്‍വേ നടപടികളാണ് വീണ്ടും പുനരാരംഭിക്കാന്‍ തീരുമാനിച്ചിരിക്കുന്നത്. പുനരധിവാസം നടപ്പിലാക്കാതെ ഒഴിഞ്ഞുപോകില്ലെന്ന നിലപാടിലാണ് പ്രദേശവാസികള്‍.നിര്‍ധനരായ നൂറു കണക്കിന് കുടുംബങ്ങളാണ് മേഖലയില്‍ താമസിക്കുന്നത്. ഓരോ തെരഞ്ഞെടുപ്പെത്തുമ്പോഴും സ്ഥിരമായി കിടപ്പാടം ഉണ്ടാക്കി തരുമെന്ന് പറഞ്ഞ് വോട്ട് വാങ്ങി പോകുന്ന രാഷ്ട്രീയ പാര്‍ട്ടികള്‍ പിന്നെ തിരിഞ്ഞുപോലും നോക്കാറില്ലെന്ന് ഇവര്‍ പറയുന്നു.
റവന്യൂ വകുപ്പുകള്‍ സംയുക്തമായിട്ടാണ് അതിര്‍ത്തി നിര്‍ണയ സര്‍വേ നടത്തുന്നത്. ഈ മാസം 30നകം സര്‍വേ പൂര്‍ത്തിയാക്കി ബന്ധപ്പെട്ട ഉദ്യോഗസ്ഥര്‍ക്ക് റിപ്പോര്‍ട്ട് നല്‍കാനാണ് ജില്ലാകലക്ടര്‍ നിര്‍ദേശം നല്‍കിയിരിക്കുന്നത്.