ലോസ് ആഞ്ചല്‍സ്: മുന്‍ ലിവര്‍പൂള്‍, ഇംഗ്ലണ്ട് നായകന്‍ സ്റ്റീവന്‍ ജെറാര്‍ഡ് മേജര്‍ ലീഗ് സോക്കര്‍ ടീം ലാ ഗാലക്‌സിയോടു വിട പറയുന്നു. ഈ സീസണോടെ താരം ക്ലബിനോടു യാത്ര പറയുമെന്നു അധികൃതര്‍ സ്ഥിരീകരിച്ചു. 2017 സീസണില്‍ ലാ ഗാലക്‌സിക്കായി ജെറാര്‍ഡ് ഇറങ്ങില്ലെന്നു ക്ലബ് ഇറക്കിയ പ്രസ്താവനയില്‍ വ്യക്തമാക്കി. അതേസമയം സജീവ ഫുട്‌ബോളില്‍ നിന്നു വിരമിക്കാന്‍ ഉദ്ദേശിക്കുന്നില്ലെന്നു 36 കാരനായ താരം വെളിപ്പെടുത്തി. 17 വര്‍ഷം ലിവര്‍പൂളില്‍ കളിച്ച ജെറാര്‍ഡ് കഴിഞ്ഞ വര്‍ഷമാണ് ലാ ഗാലക്‌സിയിലേക്ക് കൂടുമാറിയത്. 34 മത്സരങ്ങളില്‍ ഗാലക്‌സിക്കായി കളത്തിലിറങ്ങിയ ജെറാര്‍ഡ് അഞ്ചു ഗോളുകളും നേടി. സ്‌കോടിഷ് ചാംപ്യന്‍മാരായ സെല്‍റ്റിക്കടക്കമുള്ള ക്ലബുകളിലേക്ക് മുന്‍ ഇംഗ്ലീഷ് നായകന്‍ ചേക്കേറിയേക്കുമെന്നു റിപ്പോര്‍ട്ടുകളുണ്ട്.