മോസ്‌കോ: അന്താരാഷ്ട്ര ക്രിമിനല്‍ കോടതിയില്‍ (ഐ.സി.സി)നിന്നു റഷ്യ പിന്മാറി. സിറിയയിലും ക്രിമിയയിലും റഷ്യ നടത്തിയ വ്യോമാക്രമണങ്ങളെക്കുറിച്ച് അന്താരാഷ്ട്ര ക്രിമിനല്‍ കോടതി അന്വേഷിക്കണമെന്ന് യു.എന്‍ പൊതുസഭയില്‍ ആവശ്യമുയര്‍ന്ന പശ്ചാത്തലത്തിലാണ് റഷ്യയുടെ പിന്‍മാറ്റം. നേരത്തേ ദക്ഷിണാഫ്രിക്ക, ഗാംബിയ, ബുറുണ്ടി എന്നീ രാജ്യങ്ങള്‍ അന്താരാഷ്ട്ര ക്രിമിനല്‍ കോടതിയില്‍നിന്നു പിന്‍മാറിയിരുന്നു. ഇതിനു പിന്നാലെയാണ് റഷ്യയുടെയും പിന്‍മാറ്റം.
ഐ.സി.സിയുമായുള്ള പ്രാഥമിക കരാര്‍ റദ്ദാക്കാന്‍ റഷ്യന്‍ പ്രസിഡന്റ് വ്‌ളാദ്മിര്‍ പുദിന്‍ കഴിഞ്ഞ ദിവസം സര്‍ക്കാരിനു നിര്‍ദേശം നല്‍കി. സ്വതന്ത്രവും ഔദ്യോഗികവുമായ ഒരു അന്വേഷണ ഏജന്‍സിയായി ഐ.സി.സിയെ കണക്കാക്കാനാകില്ലെന്നും പക്ഷപാതപരമായ നടപടികള്‍ സ്വീകരിക്കുന്ന ഐ.സി.സി അന്താരാഷ്ട്ര സമൂഹത്തിന്റെ പ്രതീക്ഷകള്‍ തകിടംമറിച്ചതായും റഷ്യന്‍ വിദേശകാര്യമന്ത്രാലയം വ്യക്തമാക്കി.
രണ്ടായിരത്തിലാണ് റഷ്യ അന്താരാഷ്ട്ര ക്രിമിനല്‍ കോടതിയുടെ ഭാഗമായത്. നിലവില്‍ ഐ.സി.സി കരാറില്‍ ഔദ്യോഗികമായി അംഗീകരിച്ചിട്ടില്ലാത്ത റഷ്യ, അന്താരാഷ്ട്ര കോടതിയുടെ നിയമസംഹിതയില്‍ ഒപ്പുവയ്ക്കുക മാത്രമാണ് ചെയ്തിട്ടുള്ളത്.
നേരത്തേ ആഫ്രിക്കന്‍ രാജ്യങ്ങളായ ദക്ഷിണാഫ്രിക്ക, ഗാംബിയ, ബുറുണ്ടി എന്നീ രാജ്യങ്ങള്‍ അന്താരാഷ്ട്ര ക്രിമിനല്‍ കോടതിയില്‍നിന്നു പിന്‍മാറിയിരുന്നു. ആഫ്രിക്കക്കാര്‍ക്കെതിരേ പക്ഷപാതപരമായ നിലപാടുകള്‍ സ്വീകരിക്കുന്നെന്ന് ആരോപിച്ചായിരുന്നു ഇത്.