സന്‍ആ: അമേരിക്ക മുന്നോട്ടുവച്ച വെടിനിര്‍ത്തല്‍ നിര്‍ദേശം യമന്‍ തള്ളി. സര്‍ക്കാര്‍ സൈന്യവും വിമതരും തമ്മില്‍ യമനില്‍ തുടരുന്ന കനത്ത ഏറ്റുമുട്ടലുകള്‍ക്കിടെ അമേരിക്കന്‍ സ്റ്റേറ്റ് സെക്രട്ടറി ജോണ്‍ കെറി മുന്നോട്ടുവച്ച പരിഹാര നിര്‍ദേശമാണ് യമന്‍ സര്‍ക്കാര്‍ തള്ളിയത്.
ജോണ്‍ കെറിയുടെ വെടിനിര്‍ത്തല്‍ നിര്‍ദേശം തങ്ങള്‍ തള്ളുന്നതായി അറിയിച്ച യമന്‍ വിദേശകാര്യ മന്ത്രി അബ്ദുല്‍ മലിക് അല്‍ മെക്‌ലഫി, അതൊരു കരാറല്ലെന്നും ഒന്നുമില്ലാത്ത വെറുംവാക്കുകളാണെന്നും തുറന്നടിച്ചു. സൈന്യവും വിമതരും തമ്മില്‍ നടക്കുന്ന ഏറ്റുമുട്ടലില്‍ അടുത്ത ദിവസങ്ങളില്‍ യമനില്‍ 51 പേര്‍ കൊല്ലപ്പെട്ടിരുന്നു.
അറബ് സഖ്യവും ഹൂത്തിവിമതരും തമ്മില്‍ ഈ മാസം ഒന്നുമുതല്‍ താല്‍ക്കാലിക വെടിനിര്‍ത്തല്‍ കരാറിലെത്തിയിരുന്നു. എന്നാല്‍, കരാറില്‍ താല്‍പര്യമില്ലെന്നു യമന്‍ സര്‍ക്കാര്‍ പിന്നീട് അറിയിച്ചു. അന്താരാഷ്ട്ര കരാറിലൂടെ ഹൂത്തികളെ വലുതാക്കിക്കാണിക്കുന്നതില്‍ താല്‍പര്യമില്ലെന്നും യമന്‍ വിദേശകാര്യ മന്ത്രി പറഞ്ഞു.