തിരൂര്‍: രാജ്യത്തിന്റെ സ്വാതന്ത്ര്യത്തിന് വേണ്ടി ജീവിതം സമര്‍പ്പിച്ച വാഗണ്‍ ട്രാജഡി രക്തസാക്ഷികളുടെ 95ാം ആണ്ടുദിനാചരണത്തിന്റെ ഭാഗമായി എസ്.കെ.എസ്.എസ്.എഫ് ജില്ലാ കമ്മിറ്റി സംഘടിപ്പിക്കുന്ന ദേശാഭിമാന സമ്മേളനത്തിന് ഒരുക്കങ്ങളായി. സമ്മേളനത്തിന്റെ ഭാഗമായി ജുമുഅ: നിസ്‌കാരാനന്തരം മഖ്ബറകളില്‍ ഇന്ന് സിയാറത്ത് നടത്തും. കോരങ്ങത്ത് സയ്യിദ് കെ.കെ.എസ് തങ്ങള്‍ വെട്ടിച്ചിറയും കോട്ടില്‍ സയ്യിദ് എ.എസ്.കെ തങ്ങളും സിയാറത്തിന് നേതൃത്വം നല്‍കും. തിരൂര്‍ കോരങ്ങത്തെ സാംസ്‌കാരിക സമുച്ചയത്തില്‍ ഞായറാഴ്ചയാണ് ദേശാഭിമാന സമ്മേളനം. വൈകീട്ട് ഏഴിന് വഖഫ് ബോര്‍ഡ് ചെയര്‍മാന്‍ പാണക്കാട് സയ്യിദ് റഷീദലി ശിഹാബ് തങ്ങള്‍ ഉദ്ഘാടനം ചെയ്യും. സയ്യിദ് ഉമറലി തങ്ങള്‍ മണ്ണാരക്കല്‍ അധ്യക്ഷനാകും. സമസ്ത കേന്ദ്ര മുശാവറ അംഗം ഹാജി.എ.മരക്കാര്‍ ഫൈസി, റഹ്മത്തുള്ള ഖാസിമി മൂത്തേടം, ഹൈദരലി വാഫി ഇരിങ്ങാട്ടിരി, എസ്.കെ.എസ്.എസ്.എഫ് സംസ്ഥാന സെക്രട്ടറി പി.എം റഫീഖ് അഹമ്മദ്, ജില്ലാ ജനറല്‍ സെക്രട്ടറി സഹീര്‍ അന്‍വരി പുറങ്ങ് തുടങ്ങിയവര്‍ പങ്കെടുക്കും.