മഞ്ചേരി: ജില്ലാ സ്‌കൂള്‍ ശാസ്‌ത്രോത്സവത്തിനു മഞ്ചേരിയില്‍ തുടക്കമായി. 17 ഉപജില്ലകളില്‍ നിന്നും തെരഞ്ഞെടുക്കപ്പെട്ട 9700 വിദ്യാര്‍ഥികള്‍ ശാസ്ത്ര, സാമൂഹ്യ ശാസ്ത്ര, പ്രവൃത്തിപരിചയ, ഗണിത ശാസ്ത്ര, ഐ.ടി മേളകളില്‍ മാറ്റുരക്കാനെത്തി. പ്രധാന വേദിയായ മഞ്ചേരി എച്ച്.എം.വൈ.എച്ച്.എസ് സ്‌കൂളില്‍ രാവിലെ 10ന് എം. ഉമ്മര്‍ എം.എല്‍.എ ഉദ്ഘാടനം ചെയ്തു.ഇന്നലെ പ്രധാന വേദിയില്‍ നടന്ന ഹൈസ്‌കൂള്‍, ഹയര്‍ സെക്കന്‍ഡറി വിഭാഗങ്ങളിലായി 70 ഇനങ്ങളില്‍ പ്രവൃത്തി പരിചയമേള നടന്നു. ശാസ്ത്രമേളയുടെ ഭാഗമായ ക്വിസ് മല്‍സരം തുറക്കല്‍ ഹയര്‍സെക്കന്‍ഡറി സ്‌കൂളിലും നടന്നു. ശാസ്ത്രമേള, പ്രവൃത്തി പരിചയമേള എന്നിവ പ്രധാന വേദിയായ എച്ച്.എം.വൈ.എച്ച്.എസ്.എസിലും സാമൂഹ്യ ശാസ്ത്രമേള തുറക്കല്‍ എച്ച്.എം.എസ്.എ.യു.പി സ്‌കൂളിലും ഗണിതമേള ജി.ബി.എച്ച്.എസ്.എസിലും ഐ.ടി മേള ഗേള്‍സ് എച്ച്.എസ്.എസിലും വൊക്കേഷണല്‍ എക്‌സ്‌പോ ചുള്ളക്കാട് ജി.യു.പി സ്‌കുളിലുമായാണ് നടക്കുന്നത്.
ഒരു ദിവസം പിന്നിട്ടപ്പോള്‍ തല്‍സമയ പ്രവര്‍ത്തി പരിചയ മേളയില്‍ ഹയര്‍ സെക്കന്‍ഡറി വിഭാഗത്തില്‍ കൊണ്ടോട്ടി ഉപജില്ലയും ഹൈസ്‌കൂള്‍ വിഭാഗത്തില്‍ നിലമ്പൂര്‍ ഉപജില്ലയും ചാംപ്യന്മാരായി. ഹയര്‍സെക്കന്‍ഡറി വിഭാഗത്തില്‍ 11671 പോയിന്റ് നേടിയാണ് കൊണ്ടോട്ടി ഒന്നാമതെത്തിയത്. നിലമ്പൂര്‍ ഉപജില്ല 11045 പോയിന്റുമായി രണ്ടും 11009 പോയിന്റുമായി മഞ്ചേരി മൂന്നാം സ്ഥാനവും നേടി. ഹൈസ്‌കൂള്‍ വിഭാഗത്തില്‍ 13697 പോയിന്റു നേടിയ നിലമ്പൂര്‍ ഉപജില്ലയാണ് ഒന്നാമത്.13435 പോയിന്റു നേടിയ കൊണ്ടോട്ടി രണ്ടും 12994 പോയിന്റു നേടിയ മങ്കട മൂന്നാം സ്ഥാനവും നേടി.
ഹയര്‍സെക്കന്‍ഡറി വിഭാഗത്തില്‍ പെരിന്തല്‍മണ്ണ പി.എച്ച്.എസ്.എസ് 3212 പോയിന്റുമായി മുന്നേറ്റം തുടരുകയാണ്. ആതിഥേയരായ മഞ്ചേരി എച്ച്.എം.വൈ.എച്ച്.എസ്.എസ് 3190 പോയിന്റുമായി തൊട്ടുപിന്നിലുണ്ട്. ഐഡിയല്‍ കടകശ്ശേരി 3178 പോയിന്റുമായി മൂന്നാം സ്ഥാനം നേടി.
ഹൈസ്‌കൂള്‍ വിഭാഗത്തില്‍ മൂന്നിയൂര്‍ എം.എച്ച്.എസ്.എസ് 3813 പോയിന്റുമായി ഒന്നാമതെത്തി. തിരൂര്‍ക്കാട് എ.എം.എച്ച്.എസ് 3599 പോയിന്റുമായി രണ്ടാമതും ഈഴുവതിരുത്തി ഐ.എസ്.എസ് എച്ച്.എസ്.എസ് 3378 പോയിന്റുമായി മൂന്നാം സ്ഥാനവും നേടിയിട്ടുണ്ട്. യു.പി വിഭാഗം മത്സരങ്ങള്‍ ഇന്ന് നടക്കും.