കല്‍പ്പറ്റ: ജില്ലയില്‍ അപരന്‍മരും ഇക്കുറി കളത്തില്‍ സജീവമായി. മാനന്തവാടി മണ്ഡലത്തിലാണ് അപരന്‍ കളം വാണത്. യു.ഡി.എഫ് സ്ഥാനാര്‍ഥി പി.കെ ജയലക്ഷ്മിയുടെ അപര സ്ഥാനാര്‍ഥി ലക്ഷ്മി 1300 വോട്ടുകള്‍ നേടി അഞ്ചാം സ്ഥാനത്തെത്തി.
1307 വോട്ടാണ് മണ്ഡലത്തിലെ എല്‍.ഡി.എഫിന്റെ ഭൂരിപക്ഷം. ഇവിടെ ആറാം സ്ഥാനത്തെത്തിയ നോട്ട 1050 വോട്ടുകളും നേടി. 11 സ്ഥാനാര്‍ഥികളാണ് മണ്ഡലത്തില്‍ മത്സര രംഗത്തുണ്ടായിരുന്നത്. അപര സ്ഥാനാര്‍ഥിയേക്കാള്‍ പിന്നിലാണ് മത്സര രംഗത്തുണ്ടായിരുന്ന പല പാര്‍ട്ടി സ്ഥാനാര്‍ഥികളും. എല്‍.ഡി.എഫ് സ്ഥാനാര്‍ഥി ഒ.ആര്‍ കേളുവിന്റെ അപരന്മാര്‍ 779 വോട്ടുകള്‍ നേടി. കേളു ചായിമ്മല്‍ 583 വോട്ടും കേളു കൊല്ലിയില്‍ 196 വോട്ടുമാണ് നേടിയത്. 10 സ്ഥാനാര്‍ഥികള്‍ മത്സര രംഗത്തുണ്ടായിരുന്ന കല്‍പ്പറ്റ മണ്ഡലത്തില്‍ യു.ഡി.എഫ് സ്ഥാനാര്‍ഥി എം.വി ശ്രേയാംസ് കുമാറിന്റെ അപരന്‍ ശ്രേയാംസ്‌കുമാര്‍ അജ്ഞന ഹൗസ് 498 വോട്ടുകള്‍ നേടി. സുല്‍ത്താന്‍ ബത്തേരിയില്‍ യു.ഡി.എഫ് സ്ഥാനാര്‍ഥി ഐ.സി ബാലകൃഷ്ണന്റെ അപരന്‍ ബാലകൃഷ്ണന്‍ എടക്കല്‍ 387 വോട്ടുകളും നേടി. മാനന്തവാടി മണ്ഡലത്തിലാണ് അപരന്മാര്‍ സ്ഥാനാര്‍ഥികളുടെ വോട്ടുകളില്‍ നിര്‍ണായകമായത്.