കല്‍പ്പറ്റ: ജില്ലയില്‍ 'നോട്ട' താരമായി. മൂന്ന് മണ്ഡലങ്ങളില്‍ രണ്ടിടങ്ങളില്‍ നാലാം സ്ഥാനത്തും ഒരു മണ്ഡലത്തില്‍ ആറാം സ്ഥാനവുമാണ് നോട്ടക്കുള്ളത്. കല്‍പ്പറ്റ, സുല്‍ത്താന്‍ ബത്തേരി മണ്ഡലങ്ങളിലാണ് നോട്ട നാലാം സ്ഥാനത്തെത്തിയത്. മാനന്തവാടിയില്‍ ആറാം സ്ഥാനത്താണ് നോട്ട.
ജില്ലയില്‍ മൊത്തം 3483 വോട്ടാണ് നോട്ട നേടിയത്. നോട്ട നാലാം സ്ഥാനത്തെത്തിയ കല്‍പ്പറ്റ, സുല്‍ത്താന്‍ ബത്തേരി മണ്ഡലങ്ങളില്‍ യഥാക്രമം 1261, 1172 എന്നിങ്ങനെയാണ് നോട്ടക്ക് ലഭിച്ചത്. മാനന്തവാടില്‍ 1050 വോട്ടും നോട്ടക്ക് ലഭിച്ചു. പ്രധാന മുന്നണികള്‍ക്ക് പിന്നിലെത്തിയ നോട്ട പിന്തള്ളിയത് ദേശീയ, സംസ്ഥാന പാര്‍ട്ടികളെയാണ്. മാനന്തവാടിയില്‍ നാലു സ്വതന്ത്രര്‍ ഉള്‍പെടെ ആറു സ്ഥാനാര്‍ഥികളാണ് നോട്ടക്ക് പിന്നിലായത്. ഇതില്‍ ബി.എസ്.പി, സി.പി.ഐ(എം.എല്‍) പാര്‍ട്ടി സ്ഥാനാര്‍ഥികളുമുണ്ട്. കല്‍പ്പറ്റയില്‍ വെല്‍ഫയര്‍ പാര്‍ട്ടി, എസ്.ഡി.പി.ഐ, സി.പി.ഐ(എം.എല്‍)റെഡ് സ്റ്റാര്‍ എന്നീ പാര്‍ട്ടികളും നാലു സ്വതന്ത്ര സ്ഥാനാര്‍ഥികളുമാണ് നോട്ടക്ക് പിന്നിലായത്.
സുല്‍ത്താന്‍ ബത്തേരിയില്‍ ബി.എസ്.പി, സി.പി.ഐ(എം.എല്‍), സമാജ്വാദി പാര്‍ട്ടി, എസ്.യു.സി.ഐ(സി) എന്നീ പാര്‍ട്ടികളും ഒരു സ്വതന്ത്ര സ്ഥാനാര്‍ഥിയും നോക്ക് പിന്നിലായി. സ്ഥാനാര്‍ഥികളെ താല്‍പര്യമില്ലാത്തവരേയും തെരഞ്ഞെടുപ്പ് പ്രക്രിയയില്‍ പങ്കെടുപ്പിക്കാനാണ് തെരഞ്ഞെടുപ്പ് കമ്മിഷന്‍ ബാലറ്റില്‍ നോട്ട (നണ്‍ ഓഫ് ദ എബോ) ബട്ടണ്‍ ഉള്‍പ്പെടുത്തിയത്.