കുന്നംകുളം: തൃശൂര്‍ ജില്ലാ പി.ടി.എയുടെയും സെറ്റ അക്കാദമി ഓഫ് എക്‌സലന്‍സിന്റെയും സംയുക്താഭിമുഖ്യത്തില്‍ സര്‍ക്കാര്‍ എയ്ഡഡ് അണ്‍ എയ്ഡഡ് വിദ്യാലയങ്ങളിലെ എട്ട് മുതല്‍ പ്ലസ് ടു വരെയുള്ള വിദ്യാര്‍ഥികള്‍ക്കായി കുന്നംകുളത്ത് സിവില്‍ സര്‍വീസ് പരിശീലന കേന്ദ്രം ആരംഭിക്കുന്നതിന്റെ ഭാഗമായി ഓറിയന്റെഷന്‍ പരിപാടി സംഘടിപ്പിക്കുമെന്ന് ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. വിദ്യാര്‍ഥികളുടെയും രക്ഷിതാക്കളുടെയും അധ്യാപകരുടെയും ക്ഷേമവും നന്മയും വിദ്യാഭ്യാസ പുരോഗതിയും ലക്ഷ്യമാക്കി ജില്ലയില്‍ പ്രവര്‍ത്തിച്ചു വരുന്ന പി.ടി.എ വിദ്യാഭ്യാസ പ്രവര്‍ത്തനരംഗത്ത് ഒട്ടനവധി പ്രവര്‍ത്തനങ്ങള്‍ കാഴ്ച വെച്ചിട്ടുണ്ട്. പി.ടി.എ നടപ്പിലാക്കി വരുന്ന അഞ്ചിന പരിപാടികളില്‍ ഏറെ ശ്രദ്ധേയമായതാണ് സിവില്‍ സര്‍വീസ് പരിശീലന കേന്ദ്രം ആരംഭിക്കുക എന്നത്. സിവില്‍ സര്‍വീസ് എന്ന സ്വപ്നത്തെ സാധാരണക്കാരായ വിദ്യാര്‍ഥികളിലേക്ക് എത്തിക്കുക എന്ന ലക്ഷ്യം മുന്‍നിര്‍ത്തിയാണ് കുന്നംകുളത്ത് സിവില്‍ സര്‍വീസ് പരിശീലന കേന്ദ്രം ആരംഭിക്കുന്നത്. ഇതിന്റെ ഭാഗമായി നവംബര്‍ 20 ഞായാറാഴ്ച രാവിലെ ഒന്‍പതര മുതല്‍ കുന്നംകുളം ഗവ. മോഡല്‍ ബോയ്‌സ് ഹയര്‍ സെക്കന്‍ഡറി സ്‌കൂളില്‍ വെച്ച് സിവില്‍ സര്‍വീസ് ഓറിയന്റേഷന്‍ പ്രോഗ്രാം സംഘടിപ്പിക്കും. എട്ടാം ക്ലാസ് മുതല്‍ ഡിഗ്രി തലം വരെയുള്ള വിദ്യാര്‍ഥികള്‍ക്ക് പ്രോഗ്രാമില്‍ പങ്കെടുക്കാം. തുടര്‍ന്ന് നടക്കുന്ന അഭിരുചി പരീക്ഷയുടെ അടിസ്ഥാനത്തില്‍ തെരഞ്ഞെടുക്കപ്പെടുന്നവര്‍ക്ക് സ്‌കോളര്‍ഷിപ്പോടെ സിവില്‍ സര്‍വീസ് പരിശീലനം നല്‍കുന്നു. തൃശൂര്‍ അസിസ്റ്റന്റ് കളക്ടര്‍ കൃഷ്ണ തേജ ഐ.എ.എസ് പരിപാടി ഉദ്ഘാടനം ചെയ്യും. തൃശൂര്‍ ജില്ല പി.ടി.എ പ്രസിഡന്റ് എം.അരവിന്ദാക്ഷന്‍ അധ്യക്ഷനാകും. സിവില്‍ സര്‍വീസ് രംഗത്തെ പ്രമുഖര്‍ പരിപാടിയില്‍ സംബന്ധിക്കും.