വടക്കാഞ്ചേരി: മഴ കുറവ് മൂലം വന്‍ കാര്‍ഷിക നാശം നേരിടുന്ന പാടശേഖരങ്ങളില്‍ കൃഷി വകുപ്പ് മന്ത്രി വി.എസ് സുനില്‍കുമാര്‍ സന്ദര്‍ശനം നടത്തണമെന്ന് അനില്‍ അക്കര എം.എല്‍.എ ആവശ്യപ്പെട്ടു. കാര്‍ഷിക നാശം സംഭവിച്ച വര്‍ക്ക് മതിയായ നഷ്ട പരിഹാരം നല്‍കണം. ജലാശയങ്ങളില്‍ നിന്ന് വെള്ളം ലഭ്യമാക്കാന്‍ നടപടി കൈകൊള്ളണമെന്നും എം.എല്‍.എ ആവശ്യപ്പെട്ടു. ജില്ലയിലെ കോള്‍ നിലങ്ങളിലെ ചണ്ടി, കുളവാഴ, എന്നിവ നീക്കം ചെയ്യുന്നതിനും, മണ്‍ചിറകള്‍ നിര്‍മ്മിക്കുന്നതിനും വേണ്ടി വരുന്നത് നാലര കോടി രൂപയാണ്. ഇതില്‍ രണ്ടര കോടി രൂപ മാത്രമാണ് ബജറ്റില്‍ വകയിരുത്തിയിട്ടുള്ളത്. ഈ തുക അനുവദിക്കുന്നതോടൊപ്പം ആവശ്യമായ ബാക്കി തുക അനുവദിക്കുന്നതിന് നടപടി ഉണ്ടാകണമെന്നും അനില്‍ ആവശ്യപ്പെട്ടു.