റിയാദ്: ഇന്ത്യയില്‍ നിന്നും സഊദിയിലേക്ക് റിക്രൂട്ട് ചെയ്യപ്പെടുന്ന വീട്ടു വേലക്കാരികളുടെ പ്രായപരിധി 44 വയസ്സാക്കി ചുരുക്കി. നേരത്തെയുണ്ടായിരുന്ന 50 വയസ്സ് പ്രായമാണ് ഇപ്പോള്‍ കുറച്ചിരിക്കുന്നത്. ഈ പ്രായ പരിധിക്കപ്പുറത്തുള്ള ഇന്ത്യക്കാര്‍ക്ക് തൊഴില്‍ വിസകള്‍ അനുവദിക്കുകയില്ലെന്ന് മുംബൈയിലെ സഊദി കോണ്‍സുലേറ്റ് വ്യക്തമാക്കിയതായി പ്രാദേശിക പത്രങ്ങള്‍ റിപ്പോര്‍ട്ട് ചെയ്തു.

നിശ്ചിത പ്രായം കഴിഞ്ഞാല്‍ ജോലിയില്‍ ശ്രദ്ധ കേന്ദ്രീകരിക്കാന്‍ കഴിയില്ലെന്നാണ് ഇതിന് അധികൃതര്‍ നല്‍കുന്ന വിശദീകരണം. മാത്രമല്ല, ഇവിടുത്തെ കാലാവസ്ഥയും ജോലി പരിതസ്ഥിതിയും കണക്കിലെടുത്താല്‍ പ്രായക്കൂടുതലുള്ള സ്ത്രീകള്‍ക്ക് അത് താങ്ങാവുന്നതിലപ്പുറമാണ്. 44 വയസ്സിനു മുകളിലേക്കുള്ളവരുടെ വിസകള്‍ ഏതാനും ദിവസമായി കോണ്‍സുലേറ്റ് നിരസിക്കുകയായിരുന്നു.

ഇന്ത്യന്‍ സര്‍ക്കാര്‍ നിയമപ്രകാരം 30 വയസ്സ് പൂര്‍ത്തിയായവര്‍ക്ക് മാത്രമേ വിദേശ രാജ്യങ്ങളിലെ ഗാര്‍ഹിക തൊഴിലിന് അര്‍ഹതയുള്ളു. ഇന്ത്യ-സഊദി തൊഴില്‍ കരാറിലും ഇത് വ്യക്തമാക്കിയിട്ടുണ്ട്. എന്നാല്‍ മറ്റു ജോലിക്ക് ഈ പ്രായപരിധി നിശ്ചയിച്ചിട്ടില്ല. ഇന്ത്യയില്‍ നിന്നും ഈ മേഖലയിലേക്ക് വരുന്നവരില്‍ ഭൂരിഭാഗവും നിര്‍ധന കുടുംബത്തിലുള്ളവരും വിദ്യഭ്യാസം കുറഞ്ഞവരുമാണ്. നേരത്തെ വിവിധ ഗള്‍ഫ് രാജ്യങ്ങളില്‍ പരിചയമുള്ളവര്‍ക്ക് എമിഗ്രേഷന്‍ ക്ലിയറന്‍സും ആവശ്യമില്ല.

പുതിയ വ്യവസ്ഥ ഗാര്‍ഹിക വേലക്കാരി റിക്രൂട്ട്‌മെന്റിനെ കാര്യമായി ബാധിച്ചേക്കും. ഗാര്‍ഹിക തൊഴിലാളികളുടെ വിസ സ്റ്റാംപ് ചെയ്യുന്നതിന് ഇന്ത്യയിലെ ഏജന്റുമാര്‍ക്ക് സഊദി ഏജന്റോ സ്‌പോണ്‍സറോ നല്‍കുന്ന ഫീസിന്റെ രേഖകളും അപേക്ഷയോടൊപ്പം സമര്‍പ്പിക്കണമെന്നും കോണ്‍സുലേറ്റ് ആവശ്യപ്പെട്ടിട്ടുണ്ട്.