കോട്ടയം: ചര്‍ച്ച് ഓഫ് സൗത്ത് ഇന്ത്യ (സി.എസ്.ഐ) സ്ത്രീജനസഖ്യം പ്രസിഡന്റായി സി.എസ്.ഐ മധ്യകേരള മഹായിടവക വിമന്‍സ് ഫെലോഷിപ്പ് പ്രസിഡന്റ് ഡോ. സൂസന്‍ തോമസ് തെരഞ്ഞെടുക്കപ്പെട്ടു. ബംഗലൂരുവില്‍ നടന്ന സി.എസ്.ഐ സഭയുടെ 24 മഹായിടവകകളില്‍ നിന്നുമുള്ള പ്രതിനിധികള്‍ ഉള്‍പ്പെട്ട കേന്ദ്ര കമ്മിറ്റി ആണ് ഡോ. സൂസന്‍ തോമസിനെ പ്രസിഡന്റായി തെരഞ്ഞെടുത്തത്. ബംഗാരപ്പെട്ട എസ്.ഐ.ബിഎസില്‍ നിന്നും ബി.ടി.എച്ചും, ലിയണാര്‍ഡ് തിയോളജിക്കല്‍ കോളജില്‍ നിന്നും ബി.ഡിയും പൂനയിലെ യു.ബി.എസ് കോളജില്‍ നിന്നും എം.ടി.എച്ച് ബിരുദവും, സാന്‍ഫ്രാന്‍സിസ്‌ക്കോ തിയോളജിക്കല്‍ സെമിനാരിയില്‍ നിന്നും ഡോക്ടര്‍ ഓഫ് മിനിസ്ട്രി ബിരുദവും നേടിയിട്ടുണ്ട്. തിരുവല്ല വേദശാസ്ത്ര സാഹിത്യ സമിതി സെക്രട്ടറി, ബോര്‍ഡ് ഓഫ് തിയോളജിക്കല്‍ ടെസ്റ്റ് ബുക്ക് പ്രോഗ്രാം ഓഫ് സൗത്ത് ഏഷ്യാ ട്രഷറര്‍ എന്നീ പദവികള്‍ വഹിച്ചിട്ടുള്ള ഡോ. സൂസന്‍ തോമസ് സി.എസ്.ഐ ഡെപ്യൂട്ടി മോഡറേറ്റര്‍ ബിഷപ്പ് തോമസ് കെ. ഉമ്മന്റെ പത്‌നിയാണ്.