മാഡ്രിഡ്: സീസണിലെ ആദ്യ മാഡ്രിഡ് നാട്ടങ്കം ഇന്ന്. സ്പാനിഷ് ലാ ലിഗയില്‍ മാഡ്രിഡ് ടീമുകളായ അത്‌ലറ്റിക്കോ മാഡ്രിഡ്- റയല്‍ മാഡ്രിഡുമായി മാറ്റുരയ്ക്കും. നടപ്പു സീസണില്‍ ലീഗില്‍ പരാജയമറിയാതെ കുതിക്കുന്ന ഏക ടീമാണ് റയല്‍ മാഡ്രിഡ്. 11 മത്സരങ്ങള്‍ കഴിഞ്ഞപ്പോള്‍ എട്ടു വിജയങ്ങളും മൂന്നു സമനിലയുമായി അവര്‍ 27 പോയിന്റോടെ ഒന്നാം സ്ഥാനത്ത് നില്‍ക്കുന്നു. അത്‌ലറ്റിക്കോയാകട്ടെ 21 പോയിന്റുമായി നാലാം സ്ഥാനത്താണ്. നിലവിലെ ഫോം വച്ച് നോക്കിയാല്‍ റയലിനാണ് മുന്‍തൂക്കം. അതേസമയം ലാ ലിഗയിലെ മുന്‍ നാട്ടങ്കങ്ങളിലെ ഫലങ്ങള്‍ റയലിനു അനുകൂലമല്ല. മൗറീഞ്ഞോയ്ക്ക് ശേഷം വന്ന ഒരു റയല്‍ പരിശീലകനും ഇതുവരെ സിമിയോണിയ്ക്കു കീഴിലെ അത്‌ലറ്റിക്കോയെ പരാജയപ്പെടുത്താന്‍ സാധിച്ചിട്ടില്ല.  കഴിഞ്ഞ ആറു നാട്ടങ്കങ്ങളിലും സിമിയോണിയുടെ അത്‌ലറ്റിക്കോ അപരാജിതരാണ്.

സിനദിന്‍ സിദാനു അതു സാധിക്കുമോ എന്നു കണ്ടറിയാം. ഹോം പോരാട്ടത്തിലും അത്‌ലറ്റിക്കോ കരുത്തോടെ നില്‍ക്കുന്നു. സ്വന്തം മണ്ണില്‍ തുടര്‍ച്ചയായി 22 മത്സരങ്ങളാണ് അവര്‍ തോല്‍ക്കാതെ പൂര്‍ത്തിയാക്കിയിരിക്കുന്നത്.

റയല്‍ നിരയില്‍ കരിം ബെന്‍സമയും ആല്‍വരോ മൊറാറ്റയും കളിക്കില്ല. അത്‌ലറ്റിക്കോക്കായി അന്ദ്രെ മൊരേര, അഗുസ്റ്റോ ഫെര്‍ണാണ്ടസ് എന്നിവരും ഇറങ്ങില്ല.

ജര്‍മന്‍ ബുണ്ടസ് ലീഗയിലും ഇന്നു ക്ലാസ്സിക്ക് പോരാട്ടം അരങ്ങേറും. ബദ്ധവൈരികളായ ബയേണ്‍ മ്യൂണിക്ക് ബൊറൂസിയ ഡോര്‍ട്മുണ്ടുമായി ഏറ്റുമുട്ടും.