ഫോസു (ചൈന): ഇന്ത്യയുടെ പി.വി സിന്ധു ചൈന സൂപ്പര്‍ സീരീസ് പ്രീമിയര്‍ ബാഡ്മിന്റണിന്റെ സെമിയിലെത്തി. ക്വാര്‍ട്ടറില്‍ ശക്തയായ എതിരാളിയും ആതിഥേയ താരവുമായ ഹി ബിങ്ജിയാവോയെയാണ് സിന്ധു പരാജയപ്പെടുത്തിയത്. എതിരാളിക്ക് ഒരു പഴുതും അനുവദിക്കാതെ രണ്ടു സെറ്റില്‍ മത്സരം അവസാനിപ്പിക്കാന്‍ ഒളിംപിക്ക് വെള്ളി മെഡല്‍ ജേത്രിക്ക് സാധിച്ചു. സ്‌കോര്‍: 22-20, 21-10. ഈ സീസണില്‍ ബിറ്റ്ബര്‍ഗര്‍, ഫ്രഞ്ച്, ജപ്പാന്‍, സ്വിസ് ഓപണുകള്‍ നേടി മികച്ച ഫോമില്‍ നില്‍ക്കുന്ന താരമാണ് ബിങ്ജിയാവോ. ഫ്രഞ്ച് ഓപണിന്റെ രണ്ടാം റൗണ്ടില്‍ സിന്ധുവിനെ ബിങ്ജിയാവോ പരാജയപ്പെടുത്തിയിരുന്നു. ഈ പരാജയത്തിനു പകരം ചോദിക്കാനും ഇന്ത്യന്‍ താരത്തിനു സാധിച്ചു. അകനെ യമഗുചി- സങ് ജി ഹ്യാന്‍ പോരാട്ടത്തിലെ വിജയിയാണ് സൈനയുടെ അവസാന നാലിലെ എതിരാളി.
അതേസമയം പുരുഷ സിംഗിള്‍സില്‍ ഇന്ത്യന്‍ പ്രതീക്ഷയായിരുന്നു അജയ് ജയറാം ക്വാര്‍ട്ടറില്‍ പരാജയപ്പെട്ടു. നിലവിലെ ഒളിംപിക്ക് ചാംപ്യന്‍ ചൈനയുടെ ചെന്‍ ലോങാണ് അജയിനെ വീഴ്ത്തിയത്. 40 മിനുട്ട് മാത്രം നീണ്ട പോരില്‍ അജയ് ചെറുത്തു നില്‍പ്പില്ലാതെ കീഴടങ്ങി. സ്‌കോര്‍ 15-21, 14-21.