ശാസ്താംകോട്ട: കുന്നത്തൂരില്‍ പുതിയൊരു രാഷ്ട്രീയ ചരിത്രം കുറിച്ചാണ് കോവൂര്‍ കുഞ്ഞുമോന്‍ വിജയിച്ചത്. എതിരാളിയായ യു.ഡി.എഫിലെ ഉല്ലാസ് കോവൂരിനെ 20529 വോട്ടിന് പരാജയപ്പെടുത്തിയാണ്  കുഞ്ഞുമോന്‍ വീണ്ടും മണ്ഡലം കയ്പ്പിടിയിലൊതുക്കിയത്.
കഴിഞ്ഞ തവണ നേടിയ ഭൂരിപക്ഷത്തേക്കാള്‍ ഏഴായിരം വോട്ട് അധികം നേടിയാണ് ഇത്തവണ ഭൂരിപക്ഷം വര്‍ധിപ്പിച്ചത്. തുടര്‍ച്ചയായി നാലാം തവണയാണ് കുഞ്ഞുമോന്‍ നിയമസഭയിലേക്കെത്തുന്നത്.
കോവൂര്‍ കുഞ്ഞുമോന് 75725 വോട്ടും ഉല്ലാസ് കോവൂര്‍ 55196 വോട്ടും തഴവ സഹദേവന്‍ 21742 വോട്ടും നേടി. വോട്ടെണ്ണലിന്റെ തുടക്കത്തില്‍ തന്നെ വ്യക്തമായ ലീഡ് നിലനിര്‍ത്തിയാണ് കുഞ്ഞുമോന്റെ വിജയം. യു.ഡി.എഫ് സ്ഥാനാര്‍ഥി ഉല്ലാസിന് കുന്നത്തൂരിലെ ഒരു പഞ്ചായത്തിലും ലീഡ് നേടാന്‍ കഴിഞ്ഞില്ലെന്നതും ഈ തെരഞ്ഞെടുപ്പില്‍ കണാന്‍ കഴിഞ്ഞു. കുന്നത്തൂര്‍ മണ്ഡലത്തില്‍ ഉള്‍പ്പെട്ട ശൂരനാട് വടക്കില്‍ 2316ഉം, പോരുവഴിയില്‍ 1647ഉം, കുന്നത്തൂരില്‍ 2934ഉം, ശാസ്താംകോട്ടയില്‍ 2619ഉം, ശൂരനാട് വടക്ക് 1448ഉം, മൈനാഗപ്പള്ളിയില്‍  1992ഉം, പടിഞ്ഞാറെ കല്ലടയില്‍ 1186ഉം, കിഴക്കേ കല്ലടയില്‍ 2030 ഉം മണ്‍ട്രോതുരുത്തില്‍ 790ഉം വോട്ടിന്റെ ലീഡ് കുഞ്ഞുമോന് ലഭിച്ചു.