കൊല്ലം: ലോക സമാധാനത്തിനും ഇന്നു നേരിട്ടുകൊണ്ടിരിക്കുന്ന എല്ലാവിധ പ്രശ്‌നങ്ങള്‍ക്കും ശാശ്വത പരിഹാരം ദൈവ വചനമായ ഖുര്‍ആനിലുണ്ടെന്നും സമൂഹം അതിലേക്ക് തിരിയണമെന്നും പാണക്കാട് സയ്യിദ് അബ്ബാസലി ശിഹാബ് തങ്ങള്‍ അഭിപ്രായപ്പെട്ടു.
അല്‍ ഫുര്‍ഫാന്റെ നേതൃത്വത്തില്‍ കൊല്ലത്ത് നടന്നുവരുന്ന ഖുര്‍ആന്‍ പഠന പ്രവര്‍ത്തനങ്ങളുടെ ഭാഗമായി മീലാദ് മീറ്റിനോട് അനുബന്ധിച്ച് സംഘടിപ്പിച്ചിട്ടുള്ള ഖുര്‍ആന്‍ വിജ്ഞാനപരീക്ഷയുടെ പ്രഖ്യാപനവും സിലബസ് പ്രകാശനവും നടത്തി സംസാരിക്കുകയായിരുന്ന തങ്ങള്‍.
കൊല്ലത്ത് നടന്ന പ്രഖ്യാപന സമ്മേളനത്തില്‍ അല്‍ ഫുര്‍ഖാന്‍ വര്‍ക്കിംഗ് ചെയര്‍മാന്‍ എസ്. അബ്ദുല്‍ ജവാദ് ബാഖവി അധ്യക്ഷനായി. ജനറല്‍ കണ്‍വീനര്‍ അബ്ദുള്ള കുണ്ടറ സ്വാഗതം പറഞ്ഞു. ആനമങ്ങാട് മുഹമ്മദ് കുട്ടി ഫൈസി, കുരീപ്പള്ളി ഷാജഹാന്‍, ഒ.എം ഷരീഫ് ദാരിമി, അഹമ്മദ് ഉഖൈല്‍, ബ്രൈറ്റ് മുഹ്‌സിന്‍, അബ്ദുല്‍ വാഹിദ് ദാരിമി, ഖലീലുറഹ്മാന്‍ വാഫി, മുഹമ്മദ് റാഫി റഹ്മാനി, ഇ.കെ മുഹമ്മദ് ഷഹീദ് ഫൈസി, ഷഹീര്‍ ബാഖവി, സലീം ചെറുകര, മുഹമ്മദ് നൗഫല്‍, സിദ്ദീഖ് കുണ്ടറ, റമീസ് എഴുകോണ്‍, ഷാനവാസ് അബ്ദുല്‍ ലത്തീഫ്, മുഹമ്മദ് സിയാദ്, ആഷിഖ് ഇലാഹി, അബ്ദുള്ള പുലിയില, നൗഫല്‍, ഷിഹാസ് നെല്ലിവിള, റാഷിദ് യു.എം തുടങ്ങിയവര്‍ പ്രസംഗിച്ചു.