ജിദ്ദ: ദമ്മാമില്‍ ഒരു സഊദി പൊലിസ് ഉദ്യോഗസ്ഥന്‍ വെടിയേറ്റ് മരിച്ചതായി ആഭ്യന്തര മന്ത്രാലയം അറിയിച്ചു. കാറില്‍ യാത്ര ചെയ്യുന്നതിനിടെയാണ് വെടിയേറ്റത്.

ഒളിച്ചിരുന്ന മൂന്നു ആയുധധാരികള്‍ തലങ്ങും വിലങ്ങും വെടിയുതിര്‍ക്കുകയായിരുന്നുവെന്ന് കിഴക്കന്‍ മേഖല പൊലിസ് വക്താവ് കേണല്‍ സൈയ്ദ് അല്‍ റിഖൈതി പറഞ്ഞു. മാരകമായി പരുക്കേറ്റ ഇദ്ദേഹത്തെ ഉടനടി ആശുപത്രിയില്‍ എത്തിച്ചെങ്കിലും മരണം സംഭവിച്ചിരുന്നു.

സ്ഥലത്ത് നിന്ന് രക്ഷപ്പെട്ട അക്രമികള്‍ക്കായി മേഖലയിലാകെ തിരച്ചില്‍ തുടരുകയാണ്. പ്രദേശം പൊലിസ് സീല്‍ ചെയ്തിരിക്കുകയാണ്.

വിവിധ കേന്ദ്രങ്ങളില്‍ സുരക്ഷാസേന റെയ്ഡുകള്‍ നടത്തുന്നുണ്ട്. കഴിഞ്ഞ ഏതാനും മാസങ്ങള്‍ക്കിടെ സുരക്ഷ ഉദ്യോഗസ്ഥര്‍ക്കു നേരെയുള്ള മൂന്നാമത്തെ ആക്രമണമാണിത്. സംഭവത്തെ കുറിച്ച് അന്വേഷിച്ച് വരികയാണെന്ന് ആഭ്യന്തര മന്ത്രാലയം അറിയിച്ചു.