തൊടുപുഴ: 'നല്ല വായന ഉത്തമ കുടുംബ സൃഷ്ടിക്ക് ' എന്ന പ്രമേയവുമായി സമസ്ത കേരള ജംഇയത്തുല്‍ മുഅല്ലിമീന്‍ സെന്‍ട്രല്‍ കൗണ്‍സില്‍ സംഘടിപ്പിക്കുന്ന പ്രസിദ്ധീകരണ ക്യാംപയിന്റെ പ്രചരണാര്‍ഥം ജംഇയ്യത്തുല്‍ മുഅല്ലിമീന്‍ ജില്ലാ കമ്മറ്റി നേതൃത്വം നല്‍കുന്ന കണ്‍വന്‍ഷന്‍ ഇന്ന് നടക്കും.
ഉച്ചകഴിഞ്ഞ് രണ്ടിന് കാരിക്കോട് തബ്‌ലീഗുല്‍ ഇസ്‌ലാം മദ്‌റസാ ഹാളില്‍ ചേരുന്ന കണ്‍വന്‍ഷനില്‍ എസ്.കെ.ജെ.എം സിസി മെമ്പര്‍ അബ്ദുല്‍ ഖാദിര്‍ അല്‍ ഖാസിമി മലപ്പുറം സംബന്ധിക്കും. സമസ്തയുടേയും പോഷക ഘടകങ്ങളുടേയും നേതാക്കളും പ്രവര്‍ത്തകരും പങ്കെടുക്കണമെന്ന് ജംഇയ്യത്തുല്‍ മുഅല്ലിമീന്‍ ഇടുക്കി ജില്ലാ പ്രസിഡന്റ് ഹാഷിം ബാഖവി, സെക്ട്രട്ടറി പി.ഇ മുഹമ്മദ് ഫൈസി എന്നിവര്‍ അറിയിച്ചു.
സമസ്ത കേരള ജംഇയ്യത്തുല്‍ മുഅല്ലിമീന്‍ സെന്‍ട്രല്‍ കൗണ്‍സില്‍, മുഅല്ലിം പബ്ലിഷിങ് ബ്യൂറോ പ്രസിദ്ധീകരണങ്ങള്‍ ഓരോ മുസ്‌ലിം വീട്ടിലും എത്തിക്കുക എന്ന ലക്ഷ്യത്തില്‍ ഡിസംബര്‍ ഒന്നുമുതല്‍ 10 വരെയാണ് ക്യാംപയിന്‍ നടക്കുന്നത്. സന്തുഷ്ട കുടുംബം, കുരുന്നുകള്‍, അല്‍ മുഅല്ലിം എന്നിവയാണ് സമസ്ത കേരള ജംഇയത്തുല്‍ മുഅല്ലിമീന്‍ സെന്‍ട്രല്‍ കൗണ്‍സില്‍ പ്രസിദ്ധീകരണങ്ങള്‍.