ക്രൈസ്റ്റ്ചര്‍ച്ച്: ന്യൂസിലന്‍ഡിനെതിരായ ഒന്നാം ക്രിക്കറ്റ് ടെസ്റ്റില്‍ പാകിസ്താന്‍ പരാജയത്തിന്റെ വക്കില്‍. ആദ്യ ഇന്നിങ്‌സില്‍ വെറും 133 റണ്‍സില്‍ പുറത്തായ പാകിസ്താന്‍ രണ്ടാമിന്നിങ്‌സിലും പതറുന്നു.
മൂന്നാം ദിനം കളി നിര്‍ത്തുമ്പോള്‍ അവര്‍ ഏഴു വിക്കറ്റ് നഷ്ടത്തില്‍ 129 റണ്‍സെന്ന പരിതാപകരമായ അവസ്ഥയിലാണ്.  മൂന്നു വിക്കറ്റ് ശേഷിക്കേ 62 റണ്‍സ് ലീഡ് മാത്രമാണ് പാകിസ്താനുള്ളത്. കളി നിര്‍ത്തുമ്പോള്‍ സൊഹൈല്‍ ഖാന്‍ (22), ആസാദ് ഷഫീഖ് (ആറ്) എന്നിവരാണ് ക്രീസില്‍.
31 റണ്‍സ് നേടിയ ഓപണര്‍ അസ്ഹര്‍ അലിയും 29 റണ്‍സുമായി ബാബര്‍ അസമും പിടിച്ചു നില്‍ക്കാന്‍ ശ്രമം നടത്തി. മറ്റൊരാള്‍ക്കും കാര്യമായി ഒന്നാം ചെയ്യാന്‍ സാധിച്ചില്ല. മൂന്നു വിക്കറ്റ് വീഴ്ത്തിയ ട്രെന്റ് ബോള്‍ട്ടും രണ്ടു വിക്കറ്റ് നേടിയ നീല്‍ വാഗ്‌നറുമാണ് പാക് നിരയെ തകര്‍ത്തത്.
നേരത്തെ കിവീസിന്റെ ഒന്നാം ഇന്നിങ്‌സ് 200 റണ്‍സില്‍ അവസാനിപ്പിക്കാന്‍ പാകിസ്താനു കഴിഞ്ഞു. പേസിനെ തുണച്ച പിച്ചില്‍ പാക് പേസര്‍മാരാണ് കിവികളുടെ ചിറകരിഞ്ഞത്. 55 റണ്‍സ് നേടിയ അരങ്ങേറ്റക്കാരന്‍ ജീറ്റ് റാവലാണ് കിവീസിന്റെ ടോപ് സ്‌കോറര്‍. മാര്‍ക് നികോള്‍സ് 30 റണ്‍സ് നേടി. പാകിസ്താനു വേണ്ടി റാഹത്ത് അലി നാലും മുഹമ്മദ് ആമിര്‍, സൊഹൈല്‍ ഖാന്‍ എന്നിവര്‍ മൂന്നു വീതം വിക്കറ്റുകളും നേടി.