ലണ്ടന്‍: തന്റെ മൂല്ല്യമെന്തെന്നു ഇരട്ട ഗോളുകള്‍ നേടി യായ ടൂറെ കോച്ച് പെപ് ഗെര്‍ഡിയോളയ്ക്ക് ബോധ്യപ്പെടുത്തിയ പോരാട്ടത്തില്‍ മാഞ്ചസ്റ്റര്‍ സിറ്റി 2-1നു ക്രിസ്റ്റല്‍ പാലസിനെ തകര്‍ത്തു. പോയിന്റ് പട്ടികയില്‍ ഒന്നാം സ്ഥാനത്തുള്ള ലിവര്‍പൂളിനെ സതാംപ്ടന്‍ ഗോള്‍രഹിത സമനിലയില്‍ തളച്ചു. കരുത്തര്‍ നേര്‍ക്കുനേര്‍ വന്ന പോരില്‍ മാഞ്ചസ്റ്റര്‍ യുനൈറ്റഡും ആഴ്‌സണലും ഓരോ ഗോളുകള്‍ നേടി തുല്ല്യത പാലിച്ചു. മറ്റു മത്സരങ്ങളില്‍ സണ്ടര്‍ലാന്‍ഡ് സീസണിലെ രണ്ടാം വിജയം സ്വന്തമാക്കി. 3-0ത്തിനു അവര്‍ ഹള്‍ സിറ്റിയെ വീഴ്ത്തി.  സ്വാന്‍സീ സിറ്റിയോടു എവര്‍ട്ടന്‍ 1-1നു സമനിലയുമായി രക്ഷപ്പെട്ടു. നിലവിലെ ചാംപ്യന്‍മാരായ ലെയ്സ്റ്റര്‍ സിറ്റി 2-1നു വാട്‌ഫോര്‍ഡിനോടു തോല്‍വി വഴങ്ങി. ബേണ്‍മൗത്ത് 1-0ത്തിനു സ്റ്റോക് സിറ്റിയെ കീഴടക്കി.
കളിയുടെ 39, 83 മിനുട്ടുകളിലാണ് യായ ടൂറെ ഗോളുകള്‍ നേടിയത്. പെപ് ഗെര്‍ഡിയോള പരിശീലകനായ ശേഷം ടൂറെയ്ക്ക് കാര്യമായ അവസരങ്ങള്‍ നല്‍കാതിരുന്നത് ഏറെ വിമര്‍ശനങ്ങള്‍ക്കിടയായിരുന്നു. പെപ് ബാഴ്‌സയുടെ പരിശീലകനായി വന്ന സമയത്താണ് ടൂറെ അന്നു സ്പാനിഷ് ടീമില്‍ നിന്നു ഇംഗ്ലണ്ടിലേക്ക് പറന്നത്. യുവാന്‍ മാറ്റയുടെ ഗോളില്‍ മാഞ്ചസ്റ്റര്‍ യുനൈറ്റഡ് മുന്നില്‍ കയറിയപ്പോള്‍ കളിയുടെ അവസാന നിമിഷത്തില്‍ ഒലിവര്‍ ജിറൂദാണ് ആഴ്‌സണലിനു സമനില സമ്മാനിച്ചത്.

ലെയ്പ്‌സിഗ് ഒന്നാം സ്ഥാനത്ത്

മ്യൂണിക്ക്: ജര്‍മന്‍ ബുണ്ടസ് ലീഗയില്‍ അത്ഭുത കുതിപ്പ് നടത്തുന്ന ലെയ്പ്‌സിഗ് 3-2നു ബയര്‍ ലെവര്‍കൂസനെ വീഴ്ത്തി പോയിന്റ് പട്ടികയില്‍ ഒന്നാം സ്ഥാനത്തെത്തി.
മറ്റു മത്സരങ്ങളില്‍ മെയ്ന്‍സ് 4-2നു ഫ്രീബര്‍ഗിനേയും ഷാല്‍കെ 1-0ത്തിനു വോള്‍വ്‌സ്ബര്‍ഗിനേയും കൊളോണ്‍ 2-1നു ബൊറൂസിയ മോണ്‍ചെന്‍ഗ്ലാഡ്ബാചിനേയും ഇംഗോള്‍സ്റ്റഡ് 1-0ത്തിനു ഡാംസ്റ്റഡിനേയും പരാജയപ്പെടുത്തി. ഓഗ്‌സ്ബര്‍ഗ്- ഹെര്‍ത പോരാട്ടം ഗോള്‍രഹിത സമനില.
ബാഴ്‌സലോണയ്ക്ക് സമനില
മാഡ്രിഡ്: സ്പാനിഷ് ലാ ലിഗയില്‍ ബാഴ്‌സലോണയെ മലാഗ ഗോള്‍രഹിത സമനിലയില്‍ തളച്ചു. സെവിയ്യ 3-2നു ഡിപോര്‍ടീവോ ലാ കൊരുണയെ വീഴ്ത്തി.