തുറവൂര്‍: പിന്നോക്ക വികസന കോര്‍പ്പറേഷന്‍ ചെയര്‍മാനെ നീയമിച്ചതിനെച്ചൊല്ലി ജെ.എസ്.എസ് ഗൗരിയമ്മ വിഭാഗം സംസ്ഥാന കമ്മിറ്റിയില്‍ പ്രതിഷേധം ശക്തമായി. ഭൂരിപക്ഷം പേരും ചെയര്‍മാനെ നിയമിച്ചതിലുള്ള എതിര്‍പ്പു ജെ.എസ്.എസ് സംസ്ഥാന ജനറല്‍ സെക്രട്ടറി കെ.ആര്‍.ഗൗരിയമ്മയെ നേരിട്ട് അറിയിച്ചു കഴിഞ്ഞു.
സംസ്ഥാന കമ്മിറ്റിയുടെ തീരുമാനമില്ലാതെ പാര്‍ട്ടി പ്രവര്‍ത്തകന്‍ പോലുമല്ലാത്ത സംഗിത് ചക്രപാണി എന്ന ആലപ്പുഴക്കാരനെ പേയ്‌മെന്റ് വാങ്ങി നീയമിച്ചതാണെന്ന് ജെ.എസ്.എസ് സംസ്ഥാന എക്‌സിക്യൂട്ടിവ് അംഗവും അരൂര്‍ നിയോജക മണ്ഡലം ജെ.എസ്.എസ് സെക്രട്ടറിയുമായ സി.പി ബാബു ആരോപിച്ചു.
ഗൗരിയമ്മയെ ഉപജാപക സംഘം വഴി തെറ്റിക്കുന്നതായി അദ്ദേഹം പറഞ്ഞു. മൂന്ന് കോര്‍പ്പറേഷന്‍ ചെയര്‍മാന്‍ സ്ഥാനം കിട്ടുമായിരുന്നിട്ടും അതെല്ലാം ഗൗരിയമ്മയുടെ ഏകാധിപത്യ പ്രവണത മൂലം നഷ്ടപ്പെടുത്തിയതായി സി.പി. ബാബു മാധ്യമ പ്രവര്‍ത്തകരോട് പറഞ്ഞു. ജെ.എസ്.എസ്.സംസ്ഥാന എക്‌സിക്യൂട്ടിവ് ഉടനെ വിളിച്ചു ചേര്‍ക്കണമെന്നു സി.പി. ബാബു ഉള്‍പ്പെടെയുള്ള ഭൂരിപക്ഷം സംസ്ഥാന എക്‌സിക്യൂട്ടിവ് അംഗങ്ങളും ആവശ്യപ്പെട്ടിട്ടുണ്ടെന്ന് സി.പി.ബാബു വ്യക്തമാക്കി.