മട്ടാഞ്ചേരി: കശാപ്പിനായി എത്തിച്ച കാളക്കൂറ്റന്‍ ഇടഞ്ഞോടി രണ്ട് മണിക്കൂര്‍ നേരം നാട്ടുകാരെ മുള്‍ മുനയില്‍ നിര്‍ത്തി.
വെള്ളിയാഴ്ച രാത്രി പത്തര മണിയോടെ കൂവപ്പാടം മാര്‍ക്കറ്റില്‍ കശാപ്പിനായി ലോറിയില്‍ എത്തിച്ച മാടുകളുടെ കൂട്ടത്തില്‍ നിന്നാണ് കാളക്കൂറ്റന്‍ ഇടഞ്ഞോടിയത്. ഇടഞ്ഞോടിയ കാള പല വഴികളിലൂടെ കിലോമീറ്ററുകളോളം ഓടി.കാളയുടെ പിന്നാലെ ഉടമകളും ഓടിയെങ്കിലും പിടിക്കാനായില്ല.
ഓട്ടത്തിനിടയില്‍ ഒരു കാറിന് കാള നാശ നഷ്ടവും വരുത്തി. ഏകദേശം രണ്ട് മണിക്കൂറോളം നാട്ടുകാരെ പരിഭ്രാന്തരാക്കിയ കാള ഒടുവില്‍ പാണ്ടിക്കുടിയിലെ ഒരു വീടിന്റെ വളപ്പിനകത്തേക്ക് ഓടി കയറി.
ഇതിനിടെ നാട്ടുകാര്‍ വീടിന്റെ ഗെയിറ്റ് അടച്ചതോടെ കാള വളപ്പില്‍ കുടുങ്ങി. പിന്നീട് ഉടമകള്‍ എത്തി കാളയെ വടമിട്ട് കെട്ടി മുറുക്കിയാണ് കൂവപ്പാടത്തെത്തിച്ചത്.