തളിപ്പറമ്പ്: ബക്കളം ദേശീയപാതയില്‍ വാഹനാപകടത്തില്‍ എട്ടു പേര്‍ക്കു പരുക്കേറ്റു. ഒരാളുടെ നില ഗുരുതരം. ഇന്നലെ പുലര്‍ച്ചെ നാലോടെ താഴെ ബക്കളത്തായിരുന്നു കാറും ഗ്യാസ് ടാങ്കര്‍ ലോറിയും കൂട്ടിയിടിച്ചത്. കാര്‍ യാത്രക്കാരായ ആറു പേര്‍ക്കും രക്ഷാപ്രവര്‍ത്തനത്തില്‍ ഏര്‍പ്പെട്ടിരുന്ന മൂന്നുപേര്‍ക്കുമാണ് പരുക്കേറ്റത്.
വായാട്ട് ഉറൂസില്‍ പങ്കെടുത്ത് മടങ്ങുകയായിരുന്ന മലപ്പുറം വളാഞ്ചേരി സ്വദേശികള്‍ സഞ്ചരിച്ച കാര്‍ മംഗളൂരുവിലേക്കു പോകുകയായിരുന്ന ടാങ്കര്‍ ലോറിയില്‍ ഇടിക്കുകയായിരുന്നു.
കണ്ണൂരിലേക്കു പോകുകയായിരുന്ന ചൊറുക്കള സ്വദേശികള്‍ക്കു രക്ഷാപ്രവര്‍ത്തനം നടത്തുന്നതിനിടെ കണ്ടെയ്‌നര്‍ ലോറിയിടിച്ചാണു പരുക്കേറ്റത്.
വളാഞ്ചേരി സ്വദേശികളായ പാറക്കാട്ടില്‍ മുഹമ്മദ് കുട്ടി (62), ഫാത്തിമ (47), ഫൗസിയ (28), റംസീന (26), സനീപ് (34) എന്നിവരെയും ചൊറുക്കള സ്വദേശികളായ പി.കെ മഹറൂഫ് (21), മൊട്ടന്റകത്ത് പുതിയപുരയില്‍ മുഹമ്മദ് ഷിബിലി (28), പി.കെ മുഹമ്മദ് നിഷാദ് (21) എന്നിവരെയും തളിപ്പറമ്പ് ലൂര്‍ദ് ആശുപത്രിയിലും ഗുരുതരമായി പരുക്കേറ്റ കാര്‍ ഡ്രൈവര്‍ പള്ളിയാലില്‍ ഫിറോസിനെ (28) പരിയാരം മെഡിക്കല്‍ കോളജിലും പ്രവേശിപ്പിച്ചു.