കണ്ണൂര്‍: കോഴിച്ചാലിനെ അട്ടിമറിച്ച് സി.എച്ച്.എം എച്ച്.എസ്.എസ് എളയാവൂരിനു ജില്ലാ സ്‌കൂള്‍ കായിക കിരീടം. തുടര്‍ച്ചയായി ആറാം വര്‍ഷവും കിരീടം സ്വന്തമാക്കാനെത്തിയ ഗവ.ഹയര്‍ സെക്കന്‍ഡറി സ്‌കൂള്‍ കോഴിച്ചാലിനെ ഇഞ്ചോടിഞ്ച് പോരാട്ടത്തിനൊടുവിലാണ് സി.എച്ച്.എം പിന്നിലാക്കിയത്. 10 സ്വര്‍ണവും ഏഴ് വെള്ളിയും മൂന്ന് വെങ്കലവും ഉള്‍പ്പെടെ 74 പോയിന്റുമായാണ് എളയാവൂര്‍ കിരീടമുയര്‍ത്തിയത്. ഏഴ് സ്വര്‍ണവും ആറ് വെള്ളിയും അഞ്ച് വെങ്കലവും നേടിയ കോഴിച്ചാലിന്റെ കുതിപ്പ് 58 പോയിന്റില്‍ അവസാനിച്ചു. മൂന്നാം സ്ഥാനം നേടിയ സാന്‍തോം എച്ച്.എസ്.എസ് കൊളക്കാട് അഞ്ച് സ്വര്‍ണവും ഒരു വെള്ളിയും നാല് വെങ്കലവും നേടി 27 പോയിന്റ് നേടി. ആദ്യമായാണ് സി.എച്ച്.എം ജില്ലാ സ്‌കൂള്‍ കായിക കിരീടം സ്വന്തമാക്കുന്നത്. 2015ല്‍ ആരംഭിച്ച സി.എച്ച്.എം അക്കാദമിയിലൂടെയാണ് സ്‌കൂളിന്റെ കായിക രംഗം മുന്നേറ്റം സൃഷ്ടിച്ചത്. പത്തു കായികതാരങ്ങളെ കണ്ടെത്തി സൗജന്യ പരിശീലനം ഉറപ്പാക്കുന്ന അക്കാദമി ഇതിനകം സംസ്ഥാനതലത്തിലേക്കും കുട്ടികളെ എത്തിച്ചു. സ്‌കൂള്‍ കായിക അധ്യാപകന്‍ മുഹമ്മദ് സാദിഖും ശ്രീശന്‍ കൂടാളി, പുരുഷോത്തമന്‍ കാപ്പാട് എന്നിവരുമാണ് കുട്ടികളെ പരിശീലിപ്പിക്കുന്നത്.

വേഗ താരങ്ങള്‍

കണ്ണൂര്‍: സീനിയര്‍ പെണ്‍കുട്ടികളുടെ വിഭാഗത്തില്‍ 100 മീറ്റര്‍ ഓട്ടത്തില്‍ 13.2 സെക്കന്‍ഡില്‍ ഫിനിഷ് ചെയ്ത സായ് തലശ്ശേരിയുടെ സിബില ലിനറ്റ് ജോണ്‍ വേഗതയേറിയ താരമായപ്പോള്‍ ആണ്‍കുട്ടികളുടെ വിഭാഗത്തില്‍ തീര്‍ത്തള്ളി മേരിഗിരി എച്ച്.എസ്സിലെ അന്‍വിന്‍ ഷാജി 11.70 സെക്കന്‍ഡില്‍ ഫിനിഷ് ചെയ്ത് നേട്ടം കൊയ്തു. ജൂനിയര്‍ വിഭാഗം ആണ്‍കുട്ടികളില്‍ 12.85 സെക്കന്‍ഡില്‍ ഫിനിഷ് ചെയ്ത് സി.എച്ച്.എം എളയാവൂരിന്റെ അര്‍ജുന്‍ സുനില്‍ കുമാര്‍ വേഗതയേറിയ താരമായി. ഇതേ സ്‌കൂളിലെ മുഹമ്മദ് സഹലിനാണ് രണ്ടാം സ്ഥാനം. ജൂനിയര്‍ വിഭാഗം പെണ്‍കുട്ടികളില്‍ സായ് തലശ്ശേരിയുടെ അനു ജോസഫ് 12.85 സമയം കുറിച്ച് വേഗതയേറിയ താരമായി. സബ് ജൂനിയര്‍ വിഭാഗത്തില്‍ സി.എച്ച്.എം എച്ച്.എസ്.എസ് എളയാവൂരിന്റെ എം.ടി മുഹമ്മദ് ഷാന്‍ വേഗതയേറിയ താരമായി. 12.73 സെക്കന്‍ഡിലാണ് ഷാന്‍ ഫിനിഷിങ് പോയിന്റിലെത്തിയത്. സബ്ജൂനിയര്‍ പെണ്‍കുട്ടികളുടെ വിഭാഗത്തില്‍ ചെറുപുഴ സെന്റ്.ജോസഫ്‌സ് ഇംഗ്ലിഷ് മീഡിയം സ്‌കൂളിലെ ടെസ മേരി ജോസഫ് 13.95 സെക്കന്‍ഡില്‍ ഒന്നാമതെത്തി.