കുമ്പള: സ്‌കൂള്‍ ബസ് കേടായതിനാല്‍ ഡ്രൈവര്‍ കുട്ടികളെ സ്‌കൂളിലെത്തിച്ചതു കാറില്‍. വിവരമറിയാതെ കുട്ടിയെ തട്ടിക്കൊണ്ടുപോയെന്നു കരുതി രക്ഷിതാക്കളും നാട്ടുകാരും പരിഭ്രാന്തരായി. സൂരംബയല്‍ സ്വകാര്യ സ്‌കൂളിലെ അഞ്ചാം തരം വിദ്യാര്‍ഥിനിയെ തട്ടിക്കൊണ്ടു പോയെന്ന വാര്‍ത്തയാണു പരിഭ്രാന്തിക്കിടയാക്കിയത്. ഇന്നലെ രാവിടെ എട്ടരയോടെ കുമ്പള മാവിനകട്ടയിലാണു സംഭവം.
പതിവു പോലെ കുട്ടി രാവിലെ സ്‌കൂളില്‍ പോകാന്‍ ഒരുങ്ങി സ്‌കൂള്‍ ബസ് വരുന്നതും കാത്തുവീട്ടുവരാന്തയില്‍ ഇരിക്കുകയായിരുന്നു. ഇതിനിടെ അവിടെ എത്തിയ ആള്‍ട്ടോ കാറില്‍ കുട്ടി കയറിപ്പോവുകയും ചെയ്തു.
ഇതൊന്നും അറിയാതെ വീട്ടിനകത്തുണ്ടായിരുന്ന മാതാവ് പുറത്തുവരുമ്പോള്‍ കുട്ടിയെ കാണാത്തതു ചോദിച്ചപ്പോള്‍ അടുത്ത വീട്ടുകാര്‍ കാറില്‍ പോകുന്നതു കണ്ടെന്ന വിവരം പറഞ്ഞത്. ഇതോടെയാണു തട്ടിക്കൊണ്ടു പോയെന്ന സംശയമുണ്ടായത്.
കുട്ടിയുടെ പിതാവ് കുമ്പള പൊലിസ് സ്റ്റേഷനില്‍ വിളിച്ച് അറിയിച്ചതോടെ കുമ്പള സി.ഐ വി.വി മനോജിന്റെ നേതൃത്വത്തില്‍ എസ്.ഐ മെല്‍വിന്‍ ജോസ് അഞ്ച് സംഘങ്ങളായി തിരിഞ്ഞു ദേശീയ പാത, ബദിയടുക്ക റോഡ്, മൊഗ്രാല്‍ പേരാല്‍ റോഡ്, ആരിക്കാടി കളത്തൂര്‍ റോഡ് എന്നിവിടങ്ങളില്‍ വ്യാപക തിരച്ചില്‍ നടത്തി.
ഇതിനിടെ മഞ്ചേശ്വരം കാസര്‍കോട് വിദ്യാനഗര്‍ പൊലിസ് സ്റ്റേഷനുകളിലും വാമഞ്ചൂര്‍ ചെക് പോസ്റ്റിലും വിവരമറിയിച്ചിരുന്നു.
ഇതിനിടെ ഒന്‍പതരയോടെ പൊലിസ് കുട്ടി പഠിക്കുന്ന സ്‌കൂളിലെത്തി കാര്യം തിരക്കിയപ്പോഴാണു സംഭവം തട്ടിക്കൊണ്ടു പോയതല്ലെന്നു മനസിലായത്.