അബ്ദുല്ല കരിപ്പമണ്ണ

പാലക്കാട് : കയ്യില്‍ ഒരു സംഘടനാ ബാഗും തലയില്‍ തൂവെള്ള ടവ്വലും വീര്യം ചോരാത്ത പ്രവര്‍ത്തന ഊര്‍ജം നിറഞ്ഞ മുഖവുമായി പാലക്കാട് മേഖലയില്‍ ദീനി പ്രബോധനത്തിന് മുന്നില്‍ നിന്ന് നയിച്ച ഹംസ മാഷ് ഇനിയില്ല. ജന്മം കൊണ്ട് മണ്ണാര്‍ക്കാട് കോട്ടോപ്പാടം സ്വദേശി ആണെങ്കിലും കഴിഞ്ഞ നാലു പതിറ്റാണ്ടായി കര്‍മം കൊണ്ടു പാലക്കാട്ടുകാരനായിരുന്നു അദ്ദേഹം.
സംഘടനാ പ്രവര്‍ത്തകര്‍ക്കും ഉമറാക്കള്‍ക്കും മഹല്ല് പരിസര വാസികള്‍ക്കും സാധാരണക്കാര്‍ക്കും ഒരു പോലെ പ്രിയങ്കരനായിരുന്നു മാഷ്. സമസ്തയുടെ നിര്‍ദ്ദേശങ്ങള്‍ അതേപടി കീഴ് ഘടകങ്ങളിലെത്തിക്കാന്‍ സഹ പ്രവര്‍ത്തകരോടുകൂടെ ഹംസ മാസ്റ്റര്‍ മുന്നില്‍ ഉണ്ടായിരുന്നു. അര്‍ബുദ രോഗം പിടികൂടുംവരെയും കര്‍മ്മ രംഗത്തു സജീവമായിരുന്നു. പാലക്കാടിന്റെ ഗ്രാമീണ മേഖലയിലും കിഴക്കന്‍ മേഖലയിലും മദ്രസാ പ്രസ്ഥാന രംഗത്തു കൂടുതല്‍ മുന്നേറ്റമുണ്ടാക്കാന്‍ അദ്ദേഹത്തിന് കഴിഞ്ഞു.നീണ്ട പ്രവര്‍ത്തന പരിചയം ഉള്ളത് കൊണ്ട് തന്നെ കുട്ടികള്‍ മുതല്‍ പ്രായമുള്ളവര്‍ക്കിടയില്‍വരെ അദ്ദേഹത്തെ പരിചയ പ്പെടുത്തലിന്റെ ആവശ്യമില്ലായിരുന്നു. മത രംഗത്തും ഭൗതിക രംഗത്തും നിരവധി ശിഷ്യ ഗണങ്ങള്‍ അദ്ദേഹത്തിനുണ്ട്. മേപ്പറമ്പ് ബി. ഇ.എം.എല്‍.പി സ്‌കൂളിലെ അറബിക് അധ്യാപകന്‍ കൂടിയായിരുന്നു. സര്‍വിസില്‍ നിന്ന് വിരമിച്ചതിനു ശേഷം പൂര്‍ണമായും മത അധ്യാപന മേഖലയില്‍ മുഴുകി. പേഴുംകര, പിരായിരി എന്നിവിടങ്ങളിലെ മദ്രസാ അധ്യാപകനും ആയിരുന്നു. നിലവില്‍ ജംഇയ്യത്തുല്‍ മുഅല്ലിമീന്‍ ജില്ലാ ട്രഷറും പാലക്കാട് റേഞ്ച് സെക്രെട്ടറിയുമാണ്. ഹംസ മാസ്റ്ററുടെ നിര്യാണത്തോടെ കറകളഞ്ഞ സംശുദ്ധ ജീവിതം നയിച്ച വ്യക്തിയാണു വിട പറഞ്ഞിരിക്കുന്നത്. മത സാമൂഹ്യ മേഖലകളിലേ നിരവധി പേര്‍ അന്തിമോപചാരം അര്‍പ്പിച്ചു. എസ്.കെ.ജെ.എം.സി.സി പ്രസിഡന്റ് സി.കെ.എം സാദിഖ് മുസ്‌ലിയാര്‍, എസ്.വെ.എസ് ജില്ലാ പ്രസിഡന്റ് ഇമ്പിച്ചിക്കോയ തങ്ങള്‍, സെക്രട്ടറി ടി.കെ മുഹമ്മദ് കുട്ടി ഫൈസി, സി. മുഹമ്മദലി ഫൈസി, ഇ. അലവി ഫൈസി, സൈനുദ്ധീന്‍ മന്നാനി, ഹുസൈന്‍ മന്നാനി, ഹബീബ് ഫൈസി, മുസ്തഫ അശ്‌റഫി തുടങ്ങി പ്രമുഖര്‍ വസതി സന്ദര്‍ശിച്ചു.