കൊടുങ്ങല്ലൂര്‍: കയ്പമംഗലം കൂരിക്കുഴിയില്‍ നിന്നും കഞ്ചാവു വില്‍പന നടത്തി വന്നിരുന്ന ഒരാളെ എക്‌സൈസ് സംഘം പിടികൂടി. കൂരിക്കുഴി പുത്തന്‍കുളം വീട്ടില്‍ ബീരാന്‍ മൊയ്തീന്‍(65) നെയാണ് എക്‌സൈസ് റെയ്ഞ്ച് ഇന്‍സ്‌പെക്ടര്‍ വി.പി സുധാകരനും സംഘവും ചേര്‍ന്ന് അറസ്റ്റ് ചെയ്തത്.
ഇയാളില്‍ നിന്നും 150 ഗ്രാം കഞ്ചാവ് കണ്ടെടുത്തു. 500 രൂപ, 1000 രൂപ വിലകളിലുള്ള ചെറിയ പൊതികളാക്കിയാണ് ഇയാള്‍ വില്‍പ്പന നടത്തിയിരുന്നത്. രഹസ്യ വിവരത്തിന്റെ അടിസ്ഥാനത്തില്‍ 25 ഗ്രാം കഞ്ചാവുമായി മറ്റൊരാളെ നേരത്തെ പിടികൂടിയിരുന്നു. ഇയാളില്‍ നിന്നും ലഭിച്ച വിവരത്തിന്റെ അടിസ്ഥാനത്തിലാണ് അറസ്റ്റ്. പ്രിവന്റീവ് ഓഫിസര്‍മാരായ എം.കെ കൃഷ്ണന്‍, പി.ബി ദക്ഷിണാമൂര്‍ത്തി, സിവില്‍ എക്‌സൈസ് ഓഫിസര്‍മാരായ വി.ബി അബ്ദുല്‍ജബ്ബാര്‍, കെ.എസ് മന്‍മഥന്‍, വി.വി ബിന്ദുരാജ്, ജോഷി, പി.കെ സുനില്‍, പി.പി ഷാജി, ഒ.ടി വില്‍സന്‍ എന്നിവര്‍ എക്‌സൈസ് സംഘത്തിലുണ്ടായിരുന്നു.