പാറ്റ്‌ന: ഉത്തര്‍പ്രദേശിലെ കാണ്‍പൂരില്‍ ട്രെയിന്‍ പാളംതെറ്റി ഉണ്ടായ അപകടത്തില്‍ മരിച്ചവരുടെ എണ്ണം 100 ആയി. പറ്റ്‌ന ഇന്‍ഡോര്‍ എക്‌സ്പ്രസാണ് പാളം തെറ്റിയത്. പുക്രയാനു സമീപം ഇന്ന് പുലര്‍ച്ചെ മൂന്നു മണിക്കായിരുന്നു അപകടം. ട്രെയിനിന്റെ 14 കോച്ചുകളാണ് പാളം തെറ്റിയത്. 100 ഓളം പേര്‍ക്ക് പരുക്കേറ്റിട്ടുണ്ട്. എല്ലാവരും ഉറങ്ങുന്ന സമയത്താണ് അപകടം സംഭവിച്ചത്. മരണസംഖ്യ ഉയരാനുള്ള സാധ്യതയുണ്ടെന്ന് അധികൃതര്‍ അറിയിച്ചു.

അപകടത്തെത്തുടര്‍ന്ന് ഈ പാതയിലൂടെയുള്ള ട്രെയിനുകള്‍ റദ്ദാക്കി. പരുക്കേറ്റവരെ സമീപത്തെ ആശുപത്രിയില്‍ പ്രവേശിപ്പിച്ചിരിക്കുകയാണ്. സംഭവ സ്ഥലത്ത് മെഡിക്കല്‍ സംഘം ക്യാംപ് ചെയ്യുന്നുണ്ട്. ദുരന്തനിവാരണ സേനയും പൊലിസും ഫയര്‍ഫോഴ്‌സും നാട്ടുകാരും ചേര്‍ന്ന് ഇപ്പോഴും രക്ഷാപ്രവര്‍ത്തനം തുടരുകയാണ്. സംഭവത്തെക്കുറിച്ച് ഉന്നതതല അന്വേഷണത്തിന് ഉത്തരവിട്ടതായി കേന്ദ്ര റെയില്‍വേ മന്ത്രി സുരേഷ് പ്രഭു അറിയിച്ചു. കുറ്റക്കാര്‍ക്കെതിരെ കര്‍ശന നടപടി സ്വീകരിക്കുമെന്നും അദ്ദേഹം പറഞ്ഞു.

ട്രെയിനപകടത്തിനുള്ള കാരണം എന്തെന്ന് വ്യക്തമല്ല. അപകടത്തിന് ഉത്തരവാദികളായവര്‍ക്കെതിരേ കര്‍ശന നടപടി സ്വീകരിക്കുമെന്നും റെയില്‍വേ മന്ത്രി അറിയിച്ചു. സംഭവസ്ഥലത്ത് നേരിട്ടെത്തി സ്ഥിതിഗതികള്‍ വിലയിരുത്തണമെന്ന് സുരേഷ് പ്രഭുവിനോട് ആവശ്യപ്പെട്ടെന്ന് പ്രധാനമന്ത്രി പറഞ്ഞു.

അപകടത്തെ തുടര്‍ന്ന് റെയില്‍വേ ഹെല്‍പ്പ്‌ലൈന്‍ ആരംഭിച്ചു:
ഇന്‍ഡോര്‍- 07411072
ഉജ്ജയിന്‍ – 07342560906
റത്‌ലം – 074121072
ഒറൈ – 051621072
ജാന്‍സി – 05101072
പൊക്രായ – 05113270239

ദുരന്തത്തിൽ മരിച്ചവരുടെ കടുംബാംഗങ്ങൾക്കും പരുക്കേറ്റവർക്കും. കേന്ദ്ര റെയിൽവേ മന്ത്രാലയം ധനസഹായം പ്രഖ്യാപിച്ചിട്ടുണ്ട്. മരിച്ചവരുടെ കുടുംബങ്ങൾക്ക് മൂന്നര ലക്ഷംരൂപയും ഗുരുതരമായി പരുക്കേറ്റവർക്ക് 50000 രൂപയും നിസാര പരുക്കേറ്റവർക്ക് 25000 രൂപയുമാണ് നൽകുക.