തിരുവന്തപുരം: പിണറായി വിജന്റെ നേതൃത്വത്തിലുള്ള മന്ത്രിസഭയില്‍ അഴിച്ചുപണി. ബന്ധുനിയമന വിവാദത്തില്‍ രാജിവച്ച ഇ.പി ജയരാജന്റെ അഭാവം നികത്താനാണ് മന്ത്രിസഭയില്‍ അഴിച്ചുപണി നടത്തിയത്. മന്ത്രിസഭാ അഴിച്ചുപണി സംബന്ധിച്ച് സി.പി.എം സംസ്ഥാനസമിതിയിലാണ് തീരുമാനം.

ഉടുമ്പന്‍ചോല മണ്ഡലത്തില്‍ നിന്നുള്ള എം.എല്‍.എയും സി.പി.എം സംസ്ഥാന സെക്രട്ടേറിയറ്റ് അംഗവുമായ എം.എം മണി വൈദ്യുതിമന്ത്രിയാവും. ഇ.പി ജയരാജന്‍ രാജിവച്ച വ്യവസായ വകുപ്പ് നിലവിലെ ടൂറിസം, സഹകരണ മന്ത്രിയായ എ.സി മൊയ്തീന് നല്‍കും. കൂടാതെ കായിക വകുപ്പും യുവജനക്ഷേമ വകുപ്പും മൊയ്തീന്‍ തന്നെ കൈകാര്യം ചെയ്യും.

എം.എം മണി - വൈദ്യുതിമന്ത്രി
കടകംപള്ളി സുരേന്ദ്രന്‍ - ദേവസ്വം, സഹകരണം, ടൂറിസം (ദേവസ്വം, വൈദ്യുതി)
എ.സി മൊയ്തീന്‍ - വ്യവസായം, യുവജനക്ഷേമം, കായികം (ടൂറിസം, സഹകരണം)

പുതിയ ടൂറിസം, സഹകരണ വകുപ്പ് മന്ത്രിയായി കടകംപള്ളി സുരേന്ദ്രന്‍ ചുമതലയേല്‍ക്കും. നിലവില്‍ അദ്ദേഹം വൈദ്യുതി, ദേവസ്വം മന്ത്രിയാണ്. ദേവസ്വം അദ്ദേഹം തുടര്‍ന്നും കൈകാര്യം ചെയ്യും.

പിണറായി മന്ത്രിസഭ അധികാരത്തിലേറി ആറാം മാസത്തിലാണ് അഴിച്ചുപണി. മന്ത്രിസഭയുടെ ആദ്യ പുനഃസംഘടനയാണിത്. 2016 മെയ് 25ന് അധികാരത്തിലേറിയ പിണറായി മന്ത്രിസഭ അധികാരത്തിലേറിയത്. സി.പി.എം സംസ്ഥാന സമിതിയുടെ യോഗത്തില്‍ രാജിവച്ച ഇ.പി ജയരാജന്‍ പങ്കെടുത്തില്ല.