കണ്ണൂര്‍: ആഹ്ലാദ പ്രകടനത്തിനു നേരെ ബോംബെറിഞ്ഞു സി.പി.എം പ്രവര്‍ത്തകനും ഈര്‍ച്ചമില്‍ തൊഴിലാളിയുമായ രവീന്ദ്രനെ കൊലപ്പെടുത്തിയതിനു പിന്നില്‍ ആര്‍.എസ്.എസ് ഉന്നതതല ഗൂഢാലോചനയെന്ന് സി.പി.എം. പുത്തന്‍കണ്ടത്ത് സ്ഥിരമായി അക്രമങ്ങള്‍ സംഘടിപ്പിക്കുന്ന ആര്‍.എസ്.എസ് ക്രിമിനലുകളാണ് കൊലയ്ക്കു പിന്നില്‍. ഇവരുടെ താവളത്തിലൂടെ മറ്റാര്‍ക്കും പകല്‍ സമയത്തു പോലും സഞ്ചരിക്കാന്‍ കഴിയില്ല. എല്‍.ഡി.എഫ് പ്രകടനം അതുവഴി കടന്നു പോയതിനാലാണു ബോംബെറിഞ്ഞത്. ആര്‍.എസ്.എസിന്റെ ഉന്നത നേതൃത്വം നടത്തിയ ഗൂഢാലോചനയെ തുടര്‍ന്നാണ് അക്രമത്തിനു പിണറായി പഞ്ചായത്തു തന്നെ തെരഞ്ഞെടുത്തതെന്നും സി.പി.എം ജില്ലാ സെക്രട്ടറിയേറ്റ് പ്രസ്താവനയില്‍ അറിയിച്ചു.