ആലുവ: സമൂഹത്തിലെ കുരുന്നു വിദ്യാര്‍ഥികളെയും അതുവഴി സമൂഹത്തെയും ഗ്രസിച്ച് കൊണ്ടിരിക്കുന്ന സാമൂഹ്യ വിപത്തായ ലഹരിയ്‌ക്കെതിരായ പോരാട്ടത്തില്‍ സമൂഹ മനസാക്ഷി ഉണരണമെന്ന് സമസ്ത കേരള സുന്നി ബാലവേദി സംസ്ഥാന കൗണ്‍സില്‍ യോഗം ആവശ്യപ്പെട്ടു. പുതുതലമുറയെ വഴിതെറ്റിക്കുന്ന മാധ്യമങ്ങള്‍ക്ക് സര്‍ക്കാര്‍ നിയന്ത്രണം ഏര്‍പ്പെടുത്തണം. കേവല വാണിജ്യതാല്‍പര്യങ്ങള്‍ക്കപ്പുറം ആരോഗ്യമുള്ള ജനതയുടെ ജീവിതത്തിനാണ് സര്‍ക്കാറുകള്‍ ശ്രമിക്കേണ്ടത്. അത് തകര്‍ക്കുന്ന അശ്ലീല സൈറ്റുകള്‍ക്ക് നിരോധനമേര്‍പ്പെടുത്തണമെന്നും കൗണ്‍സില്‍ ആവശ്യപ്പെട്ടു.  ഇ.കെ. ഹസന്‍ ഫൈസി ഉദ്ഘാടനം ചെയ്തു. വൈസ് പ്രസിഡന്റ് പാണക്കാട് സയ്യിദ് റാജി അലി ശിഹാബ് തങ്ങള്‍ അധ്യക്ഷനായി. ആസിഫ് ദാരിമി പുളിക്കല്‍ മുഖ്യപ്രഭാഷണം നടത്തി. സയ്യിദ് ശഫീഖ് തങ്ങള്‍, അബ്ദുല്‍ ഖാദര്‍ ഖാസിമി, കെ.എച്ച്. സമദ് ദാരിമി, വി.കെ. മുഹമ്മദ് ഹാജി, പി.കെ. അബ്ദുല്‍ അസീസ്, സൈനുദ്ദീന്‍ ഒളവട്ടൂര്‍ സംസാരിച്ചു.
സമാപനസംഗമം എം.എ. ചേളാരി ഉദ്ഘാടനം ചെയ്തു. സംസ്ഥാന പ്രസിഡന്റ് സയ്യിദ് മുഈനലി ശിഹാബ് തങ്ങള്‍ അധ്യക്ഷനായി. അന്‍വര്‍ സാദത്ത് എം.എല്‍.എ, ബഷീര്‍ ഫൈസി ദേശമംഗലം, മിദ്‌ലാജ് കിടങ്ങഴി, ഹുസൈന്‍കുട്ടി മൗലവി, അബ്ദുല്‍കരീം ഫൈസി, ബുഖാരി ഫൈസി, അശ്‌റഫ് ഹുദവി, നൗഫല്‍ കുട്ടമശ്ശേരി തുടങ്ങിയവര്‍ സംസാരിച്ചു. ശഫീഖ് മണ്ണഞ്ചേരി സ്വാഗതവും, അഫ്‌സല്‍ രാമന്തളി നന്ദിയും പറഞ്ഞു.