പോത്താനിക്കാട്: കിഴക്കന്‍ മേഖലയില്‍ കഞ്ചാവ് വില്‍പനയും ഉപയോഗവും വര്‍ധിക്കുന്നു. പൈങ്ങോട്ടൂര്‍, കടവൂര്‍, ഞാറക്കാട്, ചാത്തമറ്റം പ്രദേശങ്ങളിലെ സ്‌കൂളുകളുടെ പരിസരങ്ങളിലാണ് വില്പന അധികവും നടക്കുന്നത്. ചില്ലറക്കച്ചവടക്കാരാണ് സ്‌കൂള്‍ പരിസരങ്ങളില്‍ വില്‍പന നടത്തുന്നത്. ചെറിയ പൊതികളിലായാണ് വില്‍പന. എച്ച്എസ്, എച്ച്.എസ്.എസ് വിദ്യാര്‍ഥികളും പഠനം ഉപേക്ഷിച്ചു നടക്കുന്ന യുവാക്കളുമാണ് കൂടുതലായും കഞ്ചാവ് മാഫിയയുടെ പിടിയില്‍ അമരുന്നത്. മയക്കുമരുന്നു ലോബിക്കെതിരെ അധികൃതരുടെ അടിയന്തര ശ്രദ്ധ പതിയണമെന്ന് നാട്ടുകാര്‍ പറഞ്ഞു.