മട്ടാഞ്ചേരി: ഫോര്‍ട്ട്‌കൊച്ചി, മട്ടാഞ്ചേരി മേഖലയിലെ ഹോംസ്റ്റേകള്‍ കേന്ദ്രീകരിച്ചുള്ള എക്‌സൈസ് പൊലിസ് പരിശോധനകള്‍ക്കെതിരെ പ്രതിഷേധമുയരുന്നു. ആളുകളെ ഭയപ്പെടുത്തി നിരവധി വാഹനങ്ങളുടെ അകമ്പടിയോടെ ഉദ്യോഗസ്ഥര്‍ കൂട്ടമായിയെത്തി നടത്തുന്ന പരിശോധനകള്‍ മൂലം സഞ്ചാരികള്‍ ഭയപ്പെടുകയാണെന്നും ഇത് ഹോംസ്റ്റേ സംരഭത്തെ ഗുരുതരമായി ബാധിക്കുമെന്നുമാണ് ആക്ഷേപം ഉയര്‍ന്നിട്ടുള്ളത്. പരിശോധനകള്‍ക്ക് തങ്ങള്‍ എതിരല്ലന്നും എന്നാല്‍ ഭീകരാന്തരീക്ഷം സൃഷ്ടിച്ചുള്ള പരിശോധനകള്‍ നിര്‍ത്തണമെന്നുമാണ് ആവശ്യം. രണ്ട് മാസം മുമ്പ് ഇത്തരത്തില്‍ പരിശോധന നടത്തിയെങ്കിലും അനധികൃതമായി ഒന്നും കണ്ടെത്താന്‍ കഴിഞ്ഞിരുന്നില്ല. അന്നും ഈ മേഖലയിലുള്ളവര്‍ ഇത്തരം പരിശോധനക്കെതിരെ പരാതി ഉന്നയിച്ചിരുന്നു. വീണ്ടും പതിനഞ്ചോളം വാഹനങ്ങളിലായി എത്തിയ ഉദ്യോഗസ്ഥര്‍ വിദേശ വിനോദ സഞ്ചാരികള്‍ക്ക് വലിയ ബുദ്ധിമുട്ട് സൃഷ്ടിക്കുന്നുണ്ടെന്നും പരാതിയുണ്ട്. ഇത്തരം നിലപാടുകള്‍ മൂലം പലരും ഫോര്‍ട്ട്‌കൊച്ചിയെ ഉപേക്ഷിക്കുന്ന അവസ്ഥയാണെന്നും ഇതിനെതിരെ പരാതി നല്‍കുമെന്നും ടൂറിസം പ്രൊമോട്ടേഴ്‌സ് അസോസിയേഷന്‍ പ്രസിഡന്റ് ആന്റണി കുരീത്തറ പറഞ്ഞു.