പെരിന്തല്‍മണ്ണ: 14 വയസിനു താഴെയുള്ളവരുടെ ഉത്തര മേഖലാ അന്തര്‍ജില്ലാ ദ്വിദിന ക്രിക്കറ്റ് മത്സരത്തില്‍ മലപ്പുറം- കണ്ണൂരിനെതിരേ സമനില വഴങ്ങി. നാലു മത്സരങ്ങളില്‍ നിന്നായി 17 പോയിന്റ് നേടിയ കണ്ണൂര്‍ ഉത്തര മേഖലാ ചാംപ്യന്മാരായി. മലപ്പുറം 12 പോയിന്റോടെ രണ്ടണ്ടാം സ്ഥാനം നേടി.
പെരിന്തല്‍മണ്ണ ക്രിക്കറ്റ് സ്റ്റേഡിയത്തില്‍ നടന്ന മത്സരത്തില്‍ 28 ഓവറില്‍ ഒരു വിക്കറ്റ് നഷ്ടത്തില്‍ 63 റണ്‍സ് എന്ന നിലയില്‍ രണ്ടാം ദിനം കളി പുനരാരംഭിച്ച മലപ്പുറത്തിനു 70 ഓവറില്‍ എട്ടു വിക്കറ്റ് നഷ്ടത്തില്‍ 134 റണ്‍സെടുക്കാനേ കഴിഞ്ഞുള്ളൂ. കണ്ണൂര്‍ 42 റണ്‍സിന്റെ ഇന്നിങ്‌സ് ലീഡ് നേടി. തുടര്‍ന്ന് രണ്ടണ്ടാം ഇന്നിങ്‌സ് ആരംഭിച്ച കണ്ണൂര്‍ അവസാന ദിനമായ ഇന്നലെ കളി നിര്‍ത്തുമ്പോള്‍ 31 ഓവറില്‍ നാലു വിക്കറ്റ് നഷ്ടത്തില്‍ 70 റണ്‍സെടുത്തു.