പൂനെ: അസാധുവാക്കപ്പെട്ട നോട്ടുകള്‍ സ്വീകരിക്കാന്‍ ആശുപത്രി അധികൃതര്‍ വിസമ്മതിച്ചതിനെ തുടര്‍ന്ന് പൂനെയില്‍ നവജാതശിശു ചികിത്സ കിട്ടാതെ മരിച്ചു. പൂനെയിലെ കെഇഎം ആശുപത്രിയില്‍ ഹൃദയശസ്ത്രക്രിയയ്ക്കായി പ്രവേശിപ്പിച്ച പെണ്‍കുഞ്ഞാണ് മരിച്ചത്.

ശസ്ത്രക്രിയക്കായി കുഞ്ഞിനെ റൂബി ഹാള്‍ ക്ലിനിക്കില്‍ പ്രവേശിപ്പിച്ചിരുന്നു. ശസ്ത്രക്രിയയ്ക്കു മുമ്പ് 3.5 ലക്ഷം രൂപ നല്‍കണമെന്ന് ആശുപത്രി അധികൃതര്‍ കുട്ടിയുടെ ബന്ധുക്കളെ അറിയിച്ചു. നിരോധിച്ച 500, 1000 നോട്ടുകള്‍ അടങ്ങുന്ന ഒരു ലക്ഷം രൂപ ആദ്യം അടയ്ക്കാമെന്ന് പറഞ്ഞെങ്കിലും ആശുപത്രി അധികൃതര്‍ അത് സ്വീകരിക്കാന്‍ തയാറായില്ലെന്നും ബന്ധുക്കള്‍ പറഞ്ഞു.

തുടര്‍ന്ന് ചെക്കായും ബാക്കി തുക ക്രെഡിറ്റ്, ഡെബിറ്റ് കാര്‍ഡുകള്‍ വഴി നല്‍കാമെന്നും ബന്ധുക്കള്‍ അറിയിച്ചു. എന്നാല്‍ ഞായറാഴ്ച്ച ബാങ്ക് അവധിയായതിനാല്‍ തിങ്കളാഴ്ച്ച മാത്രമേ പണം ലഭിക്കുകയുള്ളു അതിനാല്‍ മുഴുവന്‍ തുകയും പണമായി തന്ന വേണമെന്ന് ആധികൃതര്‍ അറിയിച്ചു.

തുടര്‍ന്ന് റൂബി ഹാള്‍ ക്ലിനിക്കില്‍ നിന്നും കെ.ഇ.എം ആശുപത്രിയിലേക്ക് മാറ്റുകയായിരുന്നു. ഇവിടെ വെന്റിലേറ്ററില്‍ കഴിഞ്ഞ കുഞ്ഞ് ഞായറാഴ്ച്ച രാവിലെയോടെ മരണപ്പെടുകയായിരുന്നു.