സംസ്ഥാന പിന്നാക്ക വിഭാഗ വികസന കോര്‍പറേഷന്‍ മൈക്രോ ക്രെഡിറ്റ് വായ്പയ്ക്കു കുടുംബശ്രീ സി.ഡി എസുകളില്‍നിന്ന് അപേക്ഷ ക്ഷണിച്ചു. ഒരു സി.ഡി.എസിന് പരമാവധി ഒരു കോടി രൂപവരെ വ്യവസ്ഥകള്‍ക്കു വിധേയമായി വായ്പ അനുവദിക്കും. സി.ഡി.എസുകള്‍ അവയ്ക്കു കീഴില്‍ പ്രവര്‍ത്തിക്കുന്ന അയല്‍ക്കുട്ടങ്ങള്‍ മുഖേന വ്യക്തിഗത ഗുണഭോക്താക്കള്‍ക്കു തുക വിതരണം ചെയ്യണം.

75 ശതമാനമെങ്കിലും ഒ.ബി.സി അല്ലെങ്കില്‍ മതന്യൂനപക്ഷ വിഭാഗത്തില്‍പ്പെട്ട അംഗങ്ങളുള്ള അയല്‍ക്കൂട്ടങ്ങള്‍ക്കാണ് വായ്പ വിതരണം ചെയ്യേണ്ടത്. വരുമാനദായകമായ ഏതെങ്കിലും നിയമാനുസൃത വ്യക്തിഗത ഗ്രൂപ്പ് സംരംഭങ്ങള്‍ ആരംഭിക്കുന്നതിനു വായ്പ വിനിയോഗിക്കണം. അയല്‍ക്കൂട്ടങ്ങള്‍ക്കു പരമാവധി 5 ലക്ഷം രൂപവരെയും ജെ.എല്‍.ജികള്‍ക്ക് 2.50 ലക്ഷം രൂപവരെയും വായ്പ അനുവദിക്കാം. വ്യക്തിഗത ഗുണഭോക്താവിന്റെ വായ്പാപരിധി 50,000 രൂപയാണ്. സി.ഡി.എസിന് മൂന്നു മുതല്‍ നാലു ശതമാനം വരെ പലിശ നിരക്കില്‍ അനുവദിക്കുന്ന വായ്പ അയള്‍ക്കൂട്ടങ്ങള്‍, വ്യക്തിഗത ഗുണഭോക്താകള്‍ എന്നിവര്‍ക്കു നാലു മുതല്‍ ഏഴു ശതമാനംവരെ പലിശ നിരക്കില്‍ വിതരണം ചെയ്യണം. തിരിച്ചടവ് കാലാവധി 36 മാസമാണ്.

പ്രാഥമിക അപേക്ഷയും പദ്ധതിയുടെ വിശദാംശങ്ങളും www.ksbcdc.com ല്‍ ലഭ്യമാണ്.
പ്രാഥമിക അപേക്ഷ ഡിസംബര്‍ അഞ്ചിന് കോര്‍പറേഷന്റെ ജില്ലാ, ഉപജില്ലാ ഓഫിസുകളില്‍ നല്‍കണം. ഇതിനുശേഷം അര്‍ഹരായ സി.ഡി.എസുകള്‍ കോര്‍പറേഷന്‍ വെബ്‌സൈറ്റ് വഴി വിശദമായ അപേക്ഷ ഡിസംബര്‍ 30നകം സമര്‍പ്പിക്കണം. പ്രാഥമിക അപേക്ഷ പരിശോധിച്ച് അര്‍ഹരാണെന്നു കണ്ടെത്തുന്ന സി.ഡി.എസുകളെ പദ്ധതി സംബന്ധിച്ചു വിശദീകരണവും തുടര്‍ അപേക്ഷാസമര്‍പ്പണത്തിനുള്ള മാര്‍ഗനിര്‍ദേശവും നല്‍കുന്നതിനായി സംഘടിപ്പിക്കുന്ന ശില്‍പശാലയിലേയ്ക്ക് ക്ഷണിക്കും.