ഫറോക്ക്: സ്‌കൂളിന്റെ പുരോഗതിക്കു തടസം നില്‍ക്കുന്നുവെന്നാരോപിച്ച് പ്രധാനാധ്യാപകനെ രക്ഷിതാക്കള്‍ ഉപരോധിച്ചു. നല്ലൂര്‍ ഗവ. എല്‍.പി സ്‌കൂള്‍ പ്രധാനാധ്യാപകന്‍ ടി.പി ചന്ദ്രനെയാണ് രക്ഷാകര്‍തൃ സമിതിയുടെ നേതൃത്വത്തില്‍ ഇന്നലെ ഉച്ചക്ക് ഒരുമണിയോടെ സ്‌കൂളില്‍ തടഞ്ഞുവച്ചത്.
സ്‌കൂളിന്റെ പുരോഗമന പ്രവര്‍ത്തനങ്ങള്‍ക്ക് തയാറാകാതെ അനാവശ്യമായി അവധിയെടുത്തും അവധിദിവസങ്ങളെ പ്രവര്‍ത്തി ദിവസമാക്കി രേഖയില്‍ കാണിക്കുകയും ചെയ്യുന്നുവെന്നാണ് മുഖ്യപരാതി. കൂടാതെ പലദിവസങ്ങളും സ്‌കൂളിലെത്തി ഒപ്പിട്ടു മുങ്ങുകയും സ്‌കൂളിന്റെ ദൈനംദിന പ്രവര്‍ത്തനങ്ങള്‍ അവതാളത്തിലാക്കുന്നുവെന്നാണ് രക്ഷിതാക്കള്‍ ആക്ഷേപിക്കുന്നത്. ഇക്കാര്യങ്ങള്‍ ചൂണ്ടിക്കാട്ടി പി.ടി.എ പ്രസിഡന്റ് തന്നെ വിദ്യാഭ്യാസ മന്ത്രി, ഉന്നത ഉദ്യോഗസ്ഥര്‍ തുടങ്ങിയവര്‍ക്ക് പരാതി നല്‍കിയിട്ടുണ്ട്.കുട്ടികളുടെ പോഷകാഹാരം വിതരണത്തിലും ഗുരുതര വീഴ്ചകള്‍ വരുത്തിയതായി നേരത്തെ പരാതിയുയര്‍ന്നിരുന്നു. പ്രധാനാധ്യാപകനെതിരേ സാമ്പത്തിക തിരിമറി നടത്തിയതായും വിദ്യാഭ്യാസമന്ത്രിക്ക് കൊടുത്ത പരാതിയില്‍ ഉന്നയിച്ചിട്ടുണ്ട്.
പി.ടി.എ പ്രസിഡന്റ് ഉമ്മര്‍ ഫാറൂഖിന്റെ നേതൃത്വത്തിലാണ് അധ്യാപകനെ മണിക്കൂറുകളോളം തടഞ്ഞുവച്ചത്. വിവരമറിഞ്ഞു വിദ്യാഭ്യാസ സ്ഥിരംസമിതി അധ്യക്ഷ എം. സുധര്‍മ്മ, എ.ഇ ഓഫിസിലെ പോഷകാഹര വിതരണത്തിന്റെ ചുമതലയുളള ഉദ്യോഗസ്ഥയും സ്‌കൂളിലെത്തി. ഇവര്‍ രക്ഷിതാക്കളും പ്രധാനാധ്യാപകനുമായി സംസാരിച്ച് പ്രശ്‌നത്തിന പരിഹാരമുണ്ടാക്കാമെന്ന ഉറപ്പിലാണ് ഉപരോധം അവസാനിപ്പിച്ചത്.