കൊച്ചി: 15ാമത് എറണാകുളം റവന്യൂ ജില്ലാ കായികമേളയ്ക്ക് ഇന്ന് കൊടി ഉയരും. മഹാരാജാസ് കോളജ് സ്‌റ്റേഡിയത്തില്‍ രാവിലെ 8.30ന് ജില്ലാവിദ്യാഭ്യാസ ഉപഡയറക്ടര്‍ സി.എ സന്തോഷ് പതാക ഉയര്‍ത്തുന്നതോടെ മൂന്ന് ദിവസം നീണ്ടുനില്‍ക്കുന്ന കായിക മാമാങ്കത്തിന് തുടക്കമാകും.
തുടര്‍ന്ന് സീനിയര്‍ ബോയ്‌സ്,സീനിയര്‍ ഗേള്‍സ് വിഭാഗങ്ങളില്‍ 5000 മീറ്റര്‍ ഫൈനലും ജൂനിയര്‍ ബോയ്‌സ്, ജൂനിയര്‍ ഗേള്‍സ് വിഭാഗങ്ങളില്‍ 3000 മീറ്റര്‍ ഫൈനല്‍ മത്സരങ്ങളും നടക്കും. 9.30ന് ഉദ്ഘാടന ചടങ്ങ് ആരംഭിക്കും. എസ്.ശര്‍മ്മ എം.എല്‍.എ അധ്യക്ഷതവഹിക്കുന്ന ചടങ്ങ് ഹൈബി ഈഡന്‍ എം.എല്‍.എ ഉദ്ഘാടനം ചെയ്യും. ജില്ലയിലെ 14 സബ്ജില്ലകളില്‍ നിന്നായി മൂവായിരത്തിലധികം കായികതാരങ്ങളാണ് മേളയില്‍ മാറ്റുരക്കുന്നത്.
സബ്ജൂനിയര്‍,ജൂനിയര്‍,സീനിയര്‍ ആണ്‍-പെണ്‍ വിഭാഗങ്ങളിലായി 93 ഇനങ്ങളിലായിരിക്കും മത്സരങ്ങള്‍ നടക്കുക. ആദ്യദിനത്തില്‍ 30 ഫൈനല്‍ മത്സരങ്ങള്‍ നടക്കും.
സബ്ജൂനിയര്‍ ബോയ്‌സ്,സബ്ജൂനിയര്‍ ഗേള്‍സ്,ജൂനിയര്‍ ഗേള്‍സ്,ജൂനിയര്‍ ബോയ്‌സ്,സീനിയര്‍ ഗേള്‍സ്,സീനിയര്‍ ബോയ്‌സ് വിഭാഗങ്ങളിലെ 100 മീറ്റര്‍ ഫൈനല്‍ മത്സരവും ഇന്നു നടക്കും.രണ്ടാം ദിനമായ നാളെ 35 ഫൈനലുകള്‍ നടക്കും. 28 ഫൈനലുകളായിരിക്കും മൂന്നാം ദിനത്തില്‍ നടക്കുന്നത്.
24ന് വൈകിട്ട് നാലിന് നടക്കുന്ന സമാപനസമ്മേളനം പി.ടി തോമസ് എം.എല്‍.എ ഉദ്ഘാടനം ചെയ്യും എം.സ്വരാജ് എം.എല്‍.എ അധ്യക്ഷത വഹിക്കും. മേയര്‍ സൗമിനി ജെയിന്‍ വിജയികള്‍ക്കുള്ള സമ്മാനദാനവും കെ.ജെ മാക്‌സി എം.എല്‍.എ പുരസ്‌കാര വിതരണവും നിര്‍വഹിക്കും.
കോര്‍പറേഷന്‍ വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ പൂര്‍ണ്ണിമ നാരായണന്‍ മുഖ്യാതിഥിയായിരിക്കും. മേളയില്‍ യഥാക്രമം ഒന്നും രണ്ടും മൂന്നും സ്ഥാനങ്ങള്‍ നേടുന്നവര്‍ ഡിസംബര്‍ മൂന്നു മുതല്‍ തേഞ്ഞിപ്പാലത്ത് നടക്കുന്ന സംസ്ഥാനസ്‌കൂള്‍ കായികമേളയില്‍ ജില്ലയെ പ്രതിനിധീകരിക്കും.