കൊല്ലം: ദേശീയപാതയില്‍ കരുനാഗപ്പള്ളി പുതിയകാവിന് സമീപം പൂച്ചക്കട ജംഗഷനില്‍ കെ.എസ്.ആര്‍.ടി.സി. സൂപ്പര്‍ഫാസ്റ്റ് ബസ്സും മീന്‍കയറ്റിവന്ന ലോറിയും കൂട്ടിയിടിച്ചു ബസ് യാത്രക്കാരായ ഇരുപതോളം പേര്‍ക്ക് പരുക്ക്.

ഗുരുതരമായി പരുക്കേറ്റ എറണാകുളം,ആലപ്പുഴ സ്വദേശികളായ ജോണ്‍കുട്ടി(37), സിസിലി(34), മേജോ(46) എന്നിവരെ ആലപ്പുഴ വണ്ടാനം മെഡിക്കല്‍ കോളജില്‍ ആശുപത്രിയില്‍ പ്രവേശിപ്പിച്ചു.

മറ്റുള്ളവരെ കരുനാഗപ്പള്ളി താലൂക്കാശുപത്രിയില്‍ പ്രവേശിപ്പിച്ചു. പ്രാഥമിക ചികിത്സ നല്‍കി വിട്ടയച്ചു. ലോറി ഡ്രൈവര്‍ കൊച്ചി മേപ്പറമ്പ് ഷമീറിന്(40) നിസ്സാര പരിക്കേറ്റു. കഴിഞ്ഞ ദിവസംരാത്രി 9നായിരുന്നു അപകടം.

കൊച്ചിയില്‍ നിന്നും മത്സ്യം കയറ്റി പാരപ്പള്ളിയിലേക്ക് വരികയായിരുന്ന മീന്‍ ലോറിയും തിരുവനന്തപുരത്ത് നിന്നും കോയമ്പത്തൂരിലേക്ക് പോവുകയായിരുന്ന കെ.എസ്.ആര്‍.ടി.സി. സൂപ്പര്‍ഫാസ്റ്റ് ബസുമാണ് കൂട്ടിയിടിച്ചത്. ഇടിയുടെ ആഘാതത്തില്‍ ലോറിയുടെ മുന്‍ഭാഗം പൂര്‍ണ്ണമായും തകര്‍ന്നു.

അപകടമറിഞ്ഞ് കരുനാഗപ്പള്ളിയില്‍ നിന്നും ഫയര്‍ഫോഴ്‌സും പൊലീസും എത്തി പരുക്കേറ്റവരേയും മറ്റും ആശുപത്രിയില്‍ എത്തിച്ചു. യാത്രക്കാര്‍ക്കു കമ്പികളിലും മറ്റും ഇടിച്ചാണ് പരിക്കേറ്റത്. അപകടത്തെ തുടര്‍ന്ന് ഒരു മണിക്കൂറോളം ദേശീയപാതയില്‍ ഗതാഗതം തടസപ്പെട്ടു.