തിരുവനന്തപുരം: ബന്ധു നിയമനത്തെ തുടര്‍ന്ന് മന്ത്രിസ്ഥാനം രാജിവച്ച ഇ.പി ജയരാജന്‍ ഉപയോഗിച്ചിരുന്ന ഓഫിസ് സ്വന്തമാക്കാന്‍ ഒട്ടേറെ മന്ത്രിമാര്‍ രംഗത്തെത്തിയതോടെ പൊതുഭരണവകുപ്പ് വെട്ടിലായി. ഇതോടെ പരാതിയുമായി പ്രോട്ടോക്കാള്‍ ഓഫീസര്‍ മുഖ്യമന്ത്രിയെ സമീപിച്ചു.
ഇന്നലെ അധികാരമേറ്റ എം.എം മണിയ്ക്ക് ഏത് ഓഫീസ് നല്‍കണമെന്നറിയാതെ പൊതുഭരണ വകുപ്പ് ഉച്ചവരെ നെട്ടോട്ടത്തിലായിരുന്നു. രാവിലെ മുതല്‍ നിയമസഭയിലായതിനാല്‍ മുഖ്യമന്ത്രിയില്‍ നിന്നും ഉത്തരവ് ലഭിച്ചതുമില്ല.
മുഖ്യമന്ത്രിയുടെ ഓഫീസിനു മുന്നിലായിരുന്നു മന്ത്രിസഭയിലെ രണ്ടാമനുള്ള ഓഫീസ്. കഴിഞ്ഞ മന്ത്രിസഭയുടെ കാലത്ത് അന്നത്തെ രണ്ടാമനായ പി.കെ കുഞ്ഞാലിക്കുട്ടിയുടെ ഓഫീസ് ഇവിടെയായിരുന്നു.
പിണറായി വിജയന്‍ മുഖ്യമന്ത്രിയായപ്പോള്‍ രണ്ടാമനായ ഇ.പി ജയരാജന് ഈ ഓഫീസ് അനുവദിച്ചു. മണിയെ മന്ത്രിയായി പ്രഖ്യാപിച്ചതോടെ ഈ ഓഫീസിനായി പ്രമുഖ മന്ത്രിമാര്‍ പൊതു ഭരണ വകുപ്പില്‍ സമ്മര്‍ദ്ദമുണ്ടാക്കി.
ഇതേ തുടര്‍ന്ന് മന്ത്രിമാരുടെ മുന്‍ഗണനാ ക്രമം നിശ്ചയിച്ചു തരണമെന്നാവശ്യപ്പെട്ട് പ്രോട്ടോക്കോള്‍ ഓഫീസര്‍ മുഖ്യമന്ത്രിയെ സമീപിച്ചു. എന്നാല്‍ മുഖ്യമന്ത്രിയില്‍ നിന്നും മറുപടി ലഭിയ്ക്കാത്തതിനെ തുടര്‍ന്ന് മണിയ്ക്കായി നോര്‍ത്ത് ബ്‌ളോക്കില്‍ കടകംപള്ളി സുരേന്ദ്രന്‍ നേരത്തെ ഉപയോഗിച്ചിരുന്ന ഓഫീസ് താല്‍ക്കാലികമായി ഒരുക്കാന്‍ തീരുമാനിച്ചു.
ഇത് ശ്രദ്ധയില്‍ പെട്ട മുഖ്യമന്ത്രി പ്രശ്‌ന പരിഹാരവുമായി രംഗത്തെത്തി. പുതിയ വ്യവസായ മന്ത്രിയായി ചുമതല ഏല്‍ക്കുന്ന എ.സി മൊയ്തീന് ഇ.പി ജയരാജന്‍ ഉപയോഗിച്ചിരുന്ന ഓഫീസ് അനുവദിക്കാനും, എ.സി മൊയ്തീന്‍ ഉപയോഗിച്ചിരുന്ന സൗത്ത് ബ്‌ളോക്കിലെ 619-ാം നമ്പര്‍ മണിയുടെ ഓഫിസാക്കാനും പൊതുഭരണവകുപ്പിനോട് മുഖ്യമന്ത്രി ആവശ്യപ്പെടുകയായിരുന്നു.