കോഴിക്കോട്: ശ്രീനാരായണ ഗുരുവിന്റെ 'നമുക്ക് ജാതിയില്ല' വിളംബരം ശതാബ്ദിയുടെ ജില്ലാതല ആഘോഷ പരിപാടികള്‍ ഇന്നും നാളെയുമായി കോഴിക്കോട്ട് നടക്കും. ഉച്ചക്ക് ശേഷം 2.30ന് ആര്‍ട്ട് ഗാലറിയില്‍ പത്തു ചിത്രകാരന്മാര്‍ 'ചിത്രദശകം' രചനാവിഷ്‌കാരം നടത്തും. ജില്ലാ പഞ്ചായത്ത് പ്രസിഡന്റ് ബാബു പറശ്ശേരി ഉദ്ഘാടനം ചെയ്യും. പോള്‍ കല്ലാനോട്, പ്രഭാകരന്‍, കബിത മുഖോപാധ്യായ, സുനില്‍ അശോകപുരം, സ്മിത വി.എസ്, അജയന്‍ കാരടി, സുധാകരന്‍ എടക്കണ്ടി, ശാന്തേടത്തി, സുചിത്ര ഉല്ലാസ്, കെ.സി മഹേഷ് പങ്കെടുക്കും.
നവംബര്‍ 27 വരെ ചിത്രങ്ങള്‍ ആര്‍ട്ട് ഗാലറിയില്‍ പ്രദര്‍ശിപ്പിക്കും. നാളെ വൈകിട്ട് മൂന്നിന് കോഴിക്കോട് കോര്‍പറേഷന്‍ സ്റ്റേഡിയം പരിസരത്തുനിന്ന് വിളംബര ഘോഷയാത്ര ആരംഭിക്കും. ഗുരുവിന്റെ സന്ദേശങ്ങള്‍ ഉള്‍ക്കൊള്ളുന്ന നിശ്ചലദൃശ്യങ്ങള്‍ അണിനിരക്കുന്ന ഘോഷയാത്ര ടൗണ്‍ഹാളിന് സമീപം സമാപിക്കും. നാലിന് കോഴിക്കോട് ടൗണ്‍ഹാളില്‍ നടക്കുന്ന പൊതുസമ്മേളനം തൊഴില്‍-എക്‌സൈസ് വകുപ്പ് മന്ത്രി ടി.പി രാമകൃഷ്ണന്‍ ഉദ്ഘാടനം ചെയ്യും. എം.ടി വാസുദേവന്‍ നായര്‍ മുഖ്യാതിഥിയായിരിക്കും.
ചരിത്രകാരന്‍ ഡോ. കെ.എന്‍ ഗണേഷ് പ്രഭാഷണം നടത്തും. ഡോ. എം.കെ മുനീര്‍ എം.എല്‍.എ, എ. പ്രദീപ്കുമാര്‍ എം.എല്‍.എ, ജില്ലാ പഞ്ചായത്ത് പ്രസിഡന്റ് ബാബു പറശ്ശേരി, ജില്ലാ കലക്ടര്‍ എന്‍. പ്രശാന്ത് സംസാരിക്കും. പൊതുസമ്മേളനത്തിന് ശേഷം 'കാളിനാടകം' ആസ്പദമാക്കി വിനീത നെടുങ്ങാടി ചിട്ടപ്പെടുത്തി അവതരിപ്പിക്കുന്ന മോഹിനിയാട്ടം അരങ്ങേറും. ഇന്‍ഫര്‍മേഷന്‍ ആന്‍ഡ് പബ്ലിക് റിലേഷന്‍സ് വകുപ്പും ലൈബ്രറി കൗണ്‍സിലും സാംസ്‌കാരിക വകുപ്പും ചേര്‍ന്നാണ് വിളംബര ശതാബ്ദി ആഘോഷ പരിപാടികള്‍ക്ക് നേതൃത്വം നല്‍കുന്നത്.