കോട്ടയം: റബര്‍ ഉല്‍പാദനം കുറഞ്ഞുവരുന്ന പ്രവണതയില്‍ മാറ്റമുണ്ടായതായും ഈവര്‍ഷം ഏപ്രില്‍ മുതല്‍ ഒക്ടോബര്‍ വരെയുള്ള കാലയളവില്‍ കഴിഞ്ഞവര്‍ഷം ഇതേ കാലയളവിനെ അപേക്ഷിച്ച് 10.94 ശതമാനം ഉല്‍പാദനവര്‍ധനയുണ്ടായതായും റബര്‍ബോര്‍ഡ് അറിയിച്ചു. ഈ വര്‍ഷം ഒക്‌ടോബര്‍ മാസത്തെ ഉല്‍പാദനത്തില്‍ മാത്രം കഴിഞ്ഞവര്‍ഷം ഇതേ മാസത്തേക്കാള്‍ 15.4 ശതമാനം വര്‍ധനയുണ്ടായിട്ടുണ്ട്. ഈ രീതിയില്‍ വര്‍ധന തുടരുകയാണെങ്കില്‍ ഈ വര്‍ഷത്തെ 6.54 ലക്ഷം ടണ്‍ എന്ന ഉല്‍പാദനലക്ഷ്യം നേടാനാകുമെന്നും ബോര്‍ഡ് അറിയിച്ചു.
വിലക്കുറവിന്റെ പശ്ചാത്തലത്തില്‍ റബറിന്റെ ഉല്‍പാദനവും ഉല്‍പാദനക്ഷമതയും വര്‍ധിപ്പിക്കുന്നതിനുള്ള തീവ്രശ്രമമാണ് റബര്‍ബോര്‍ഡ് നടത്തിവരുന്നത്. ഉല്‍പാദനക്ഷമതാ വര്‍ധനയ്ക്കായി ബോര്‍ഡിന്റെ വിവിധ പ്രവര്‍ത്തനങ്ങള്‍ ഏകോപിപ്പിച്ച് അതാത് മേഖലകളില്‍ പ്രായോഗികമായ കാര്‍ഷികപ്രവര്‍ത്തനങ്ങള്‍ കര്‍ഷകരിലെത്തിക്കാന്‍ കഴിഞ്ഞു.
ഇന്ത്യയിലെ പരമ്പരാഗത റബര്‍കൃഷി മേഖലയില്‍ ഉല്‍പാദനക്ഷമത വര്‍ധിപ്പിക്കുന്നതിനുള്ള പ്രധാനമാര്‍ഗം ടാപ്പിങ് കൂടുതല്‍ ശാസ്ത്രീയമാക്കുകയാണ്. ഇതിനുവേണ്ടി പ്രധാന്‍മന്ത്രി കൗശല്‍ വികാസ് യോജനയുടെ ഭാഗമായി നാഷണല്‍ സ്‌കില്‍ ഡെവലപ്‌മെന്റ് കോര്‍പറേഷനും റബര്‍ സ്‌കില്‍ ഡെവലപ്‌മെന്റ് കൗണ്‍സിലുമായി ചേര്‍ന്ന് വിപുലമായ പരിശീലനപരിപാടികള്‍ക്ക് റബര്‍ബോര്‍ഡ് രൂപം നല്‍കിയിട്ടുണ്ട്. നിലവിലുള്ള ടാപ്പര്‍മാരുടെ നൈപുണ്യവികസനം ലക്ഷ്യമിട്ടുള്ള ഈ പരിശീലനപരിപാടികള്‍ നവംബര്‍ 23നു തുടങ്ങും. കേരളത്തിലെ 350ഓളം കേന്ദ്രങ്ങളിലാണ് പരിശീലനപരിപാടികള്‍ നടക്കുക. ഈ പരിശീലനപരിപാടിയില്‍ 18 വയസിനുമേല്‍ പ്രായമുള്ള റബര്‍ടാപ്പര്‍മാര്‍ക്കും സ്വന്തം തോട്ടങ്ങളില്‍ ടാപ്പ് ചെയ്യുന്ന കര്‍ഷകര്‍ക്കും പങ്കെടുക്കാം. ഒന്നാംഘട്ടത്തില്‍ പതിനായിരം പേര്‍ക്ക് പരിശീലനം നല്‍കും.
വിജയകരമായി പരിശീലനം പൂര്‍ത്തിയാക്കുന്നവര്‍ക്ക് നാഷനല്‍ സ്‌കില്‍ ഡവലപ്‌മെന്റ് കൗണ്‍സില്‍ നല്‍കുന്ന സര്‍ട്ടിഫിക്കറ്റും 500 രൂപ സ്റ്റൈപ്പന്റും ലഭിക്കും. വിവരങ്ങള്‍ക്ക് അടുത്തുള്ള റബര്‍ബോര്‍ഡ് റീജിയണല്‍ ഓഫിസുമായി ബന്ധപ്പെടണം.