കോഴിക്കോട്: അറിയിപ്പില്ലാതെ മത്സരങ്ങള്‍ മാറ്റിവച്ചത് പ്രതിഷേധത്തിനിടയാക്കി. ഇന്നലെ നടക്കേണ്ട മത്സരങ്ങള്‍ ഇന്നത്തേക്ക് മാറ്റിയതും ചില മത്സരങ്ങള്‍ ക്രമംതെറ്റിച്ചു നടത്തിയതുമാണ് പ്രതിഷേധത്തിനു കാരണമായത്. മത്സരങ്ങളുടെ ഷെഡ്യൂളിലുണ്ടായ മാറ്റങ്ങള്‍ കുട്ടികളെ തിരക്കിട്ട് പല മത്സരങ്ങളിലും പങ്കെടുക്കേണ്ട അവസ്ഥിയിലെത്തിച്ചെന്ന് പരിശീലകര്‍ പരാതിപ്പെട്ടു. ഇന്നലെ രാവിലെ 8.30ന് നടക്കേണ്ടിയിരുന്ന സബ്ജൂനിയര്‍ ആണ്‍കുട്ടികളുടെ ഡിസ്‌കസ്‌ത്രോ ഉച്ചവരെ നടന്നില്ല. പിന്നീട് ഉച്ചയ്ക്ക് ശേഷമാണ് ഈ മത്സരം ഇന്നത്തേക്ക് മാറ്റിയതായി അറിയിക്കുന്നത്. ചോമ്പാല ഉപജില്ലയില്‍ നിന്നുള്‍പ്പെടെ മറ്റ് ദൂര സ്ഥലങ്ങളില്‍ നിന്നും പുലര്‍ച്ചെ എത്തിയവര്‍ക്ക് ഇതോടെ തിരിച്ചുപോകേണ്ട അവസ്ഥയുണ്ടായി. ഇവര്‍ ഇന്നു വീണ്ടും മത്സരത്തിനായി എത്തണം.