ചെറുവത്തൂര്‍ : വീട്ടുകിണര്‍ ശുചീകരിക്കാന്‍ ഇറങ്ങി കാല്‍ കുഴഞ്ഞ യുവാവിനെ ഫയര്‍ഫോഴ്‌സ് രക്ഷപ്പെടുത്തി കരക്കെത്തിച്ചു. തിമിരി പാലത്തേരയിലെ പി പ്രശാന്തി(33)നെയാണ് തൃക്കരിപ്പൂരില്‍ നിന്നുമെത്തിയ ഫയര്‍ഫോഴ്‌സ് രക്ഷപ്പെടുത്തിയത്.
ഇന്നലെ ഉച്ചക്ക് 12.30 ഓടെ കിണര്‍ വൃത്തിയാക്കാന്‍ ഇറങ്ങിയ പ്രശാന്തിന് കൈകാലുകള്‍ കുഴയുകയും തിരിച്ചു കയറാന്‍ സാധിക്കാതെ കുടുങ്ങുകയുമായിരുന്നു.
നാട്ടുകാര്‍ വിവരമറിയിച്ചതിനെത്തുടര്‍ന്ന് അസിസ്റ്റന്റ് സ്റ്റേഷന്‍ ഓഫീസര്‍ ഗോപാലകൃഷ്ണന്‍ മാവിലയുടെ നേതൃത്വത്തില്‍ ഫയര്‍മാന്‍ കെ വിനീഷ് കുമാര്‍ കിണറില്‍ ഇറങ്ങി വല ഉപയോഗിച്ച് യുവാവിനെ കരക്കെത്തിക്കുകയായിരുന്നു. കാലിനും കൈകള്‍ക്കും പരുക്കേറ്റ യുവാവിനെ നീലേശ്വരത്തെ സ്വകാര്യ ആശുപത്രിയില്‍ പ്രവേശിപ്പിച്ചു