കല്‍പ്പറ്റ: വയനാട് അരപ്പറ്റയില്‍ ആരംഭിച്ച അന്‍പത്തിമൂന്നാമത് സംസ്ഥാന സീനിയര്‍ ഫുട്‌ബോള്‍ ചാംപ്യന്‍ഷിപ്പിന്റെ ആദ്യ ദിനത്തില്‍ തിരുവനന്തപുരത്തിനും മലപ്പുറത്തിനും ജയം. ഉച്ചയ്ക്കു നടന്ന ആദ്യ മത്സരത്തില്‍ ഏകപക്ഷീയമായ ആറു ഗോളുകള്‍ക്ക് തിരുവനന്തപുരം പാലക്കാടിനെ തകര്‍ത്തു. തിരുവനന്തപുരത്തിനായി സജീവ് ഖാന്‍ മൂന്നു ഗോളുകള്‍ നേടി ടോപ്പ് സ്‌കോററായി. 22, 60, 77 മിനുട്ടുകളിലാണ് സജീവ് ഖാന്‍ വല കുലുക്കിയത്. ജോബി ജസ്റ്റിന്‍ (രണ്ടു ഗോള്‍), ജിപ്‌സണ്‍( ഒരു ഗോള്‍) എന്നിവരാണ് മറ്റു സ്‌കോറര്‍മാര്‍.
രണ്ടാമത്തെ മത്സരത്തില്‍ മലപ്പുറം ഒന്നിനെതിരേ രണ്ടു ഗോളുകള്‍ക്ക് കണ്ണൂരിനെ പരാജയപ്പെടുത്തി. മലപ്പുറത്തിന്റെ രണ്ടു ഗോളുകളും ഉസ്മാന്റെ വകയായിരുന്നു. ആദ്യ പകുതിയിലെ 28, 45 മിനുട്ടുകളിലാണ് ഉസ്മാന്‍ ഗോളുകള്‍ നേടിയത്. രണ്ടാം പകുതിയില്‍ ധനേഷ് കണ്ണൂരിന്റെ ആശ്വാസ ഗോള്‍ നോടി. ഇന്നു ആദ്യ മത്സരത്തില്‍ കോഴിക്കോട് ഇടുക്കിയേയും രണ്ടാമത്തെ മത്സരത്തില്‍ തിരുവനന്തപുരം മലപ്പുറത്തിനേയും നേരിടും.