കൊച്ചി:15-ാമത് എറണാകുളം റവന്യൂ ജില്ലാ കായികമേളയുടെ തുടക്കം ഗംഭീരമാക്കിയതിന്റെ സന്തോഷത്തിലാണ് കോതമംഗലം മാര്‍ ബേസിലിലെ പ്ലസ് ടു വിദ്യാര്‍ഥിയായ ബിബിന്‍ ജോര്‍ജ്.
മേളയിലെ ആദ്യ ഇനമായ സീനിയര്‍ ആണ്‍കുട്ടികളുടെ 5000 മീറ്ററിലാണ് ബിബിന്‍ ജോര്‍ജ് കഴിഞ്ഞവര്‍ഷത്തെ തന്റെ തന്നെ മീറ്റ് റിക്കോഡ് തകര്‍ത്തുകൊണ്ട്് സ്വര്‍ണം നേടിയത്.
കഴിഞ്ഞവര്‍ഷത്തേതിലും 13 സെക്കന്റ് സമയം കുറവെടുത്തുകൊണ്ടായിരുന്ന ബിബിന്‍ ഫിനിഷ് ചെയ്തത്. സമയം 15.59 മിനിറ്റ്. ഉച്ചയ്ക്ക് ശേഷം നടന്ന 800 മീറ്ററിലും ബിബിന്‍ സ്വര്‍ണം നേടി.ഇന്ന് നടക്കുന്ന 1500 മീറ്ററിലും ബിബിന്‍ മത്സരിക്കുന്നുണ്ട്.
അഞ്ചാംക്ലാസുമുതല്‍ പങ്കെടുക്കുന്ന ഇനങ്ങളിലൊക്കെ സ്വര്‍ണവും വെള്ളിയുമൊക്കെ വാരിക്കൂട്ടിയിട്ടുള്ള ബിബിന്‍ കോഴിക്കോട് വച്ച് നടന്ന ഇക്കഴിഞ്ഞ ദേശീയ സ്‌കൂള്‍ കായികമേളയിലെ ചാംപ്യനായിരുന്നു.5000മീ.,1500 മീ.എന്നിവയില്‍ സ്വര്‍ണവും 800 മീറ്ററില്‍ വെങ്കലവും നേടിക്കൊണ്ടായിരുന്നു ബിബിന്‍ ചാംപ്യന്‍പട്ടം സ്വന്തമാക്കിയത്.
തൊടുപുഴ മാപ്പിളശ്ശേരിയില്‍ ജോര്‍ജിന്റെയും റജീനയുടെയും മകനാണ് ബിബിന്‍.പ്ലസ്ടു വിദ്യാര്‍ഥിയായ ബിബിന്‍ ജോര്‍ജിന് തുടര്‍ന്നു പഠിക്കുന്നതിലും താല്‍പര്യം ജോലി സമ്പാദിക്കുന്നതിലാണ്.
കോയമ്പമ്പത്തൂരില്‍ നടന്ന ദേശിയ ജൂനിയര്‍ അത്‌ലറ്റിക് മീറ്റിലെ ബിബിന്റെ പ്രകടനം കണ്ട് ജബല്‍പൂരിലെ ആര്‍മിയിലേക്ക് ക്ഷണിച്ചതായും ബിബിന്‍ പറഞ്ഞു.ഷിബി മാത്യുവാണ് ബിബിന്‍ ജോര്‍ജിന്റെ പരിശീലക.
തേഞ്ഞിപ്പാലത്ത് നടക്കുന്ന സംസ്ഥാന സ്‌കൂള്‍ കായികമേളയില്‍ ചാമ്പ്യന്‍ഷിപ്പ് നിലനിര്‍ത്താന്‍ ബിബിന്‍ പരിശീലനം ആരംഭിച്ചു കഴിഞ്ഞു.തന്റെ പേരില്‍ 5000 മീറ്ററിലുള്ള സംസ്ഥാന റെക്കോഡ് തകര്‍ക്കാന്‍ തീവ്രശ്രമത്തിലാണ് ബിബിന്‍ ജോര്‍ജ്.