തിരുവനന്തപുരം: ബന്ധു നിയമന വിവാദത്തെ തുടര്‍ന്ന് രാജിവെച്ച മുന്‍ മന്ത്രി ഇ.പി ജയരാജനെതിരെ സി.പി.എം.

പാര്‍ട്ടിയുമായി കലഹത്തിലായ ഇ.പി ജയരാജനുമേലുളള കുരുക്ക് മുറുക്കാനാണ് പാര്‍ട്ടി തീരുമാനം. ജയരാജന്‍ സെക്രട്ടേറിയറ്റില്‍ നിന്നും ഇറങ്ങിപ്പോയ നടപടി തെറ്റാണെന്നാണ് സിപിഐഎം വിലയിരുത്തല്‍.

കൂടാതെ നാളെ തിരുവനന്തപുരത്ത് നടക്കുന്ന സംസ്ഥാന സെക്രട്ടേറിയറ്റില്‍ പങ്കെടുക്കണമെന്നും ഇ.പി ജയരാജന് പാര്‍ട്ടി നിര്‍ദേശം നല്‍കിയിട്ടുണ്ട്. സംസ്ഥാന നേതൃത്വമാണ് ഇത് സംബന്ധിച്ച നിര്‍ദേശം നല്‍കിയത്.

കഴിഞ്ഞ ദിവസം പുതിയ മന്ത്രിയെ തീരുമാനിച്ച സംസ്ഥാന സെക്രട്ടേറിയറ്റ് യോഗത്തില്‍ നിന്നും ഇ.പി ജയരാജന്‍ ഇറങ്ങിപ്പോയിരുന്നു. പിന്നാലെ സംസ്ഥാന സമിതി യോഗത്തിലും പങ്കെടുത്തിരുന്നില്ല. ഇന്നലെ നടന്ന പ്രത്യേക നിയമസഭാ സമ്മേളനത്തില്‍ നിന്നും വൈകിട്ട് നടന്ന എംഎം മണിയുടെ സത്യപ്രതിജ്ഞ ചടങ്ങില്‍ നിന്നും ഇ.പി ജയരാജന്‍ വിട്ടുനിന്നിരുന്നു.

ഇത് തെറ്റിദ്ധാരണയുണ്ടാക്കിയതായാണ് വിലയിരുത്തല്‍. മുഖ്യമന്ത്രി അഭ്യര്‍ത്ഥിച്ചിട്ടും സംസ്ഥാന സമിതിയില്‍ നിന്നും ജയരാജന്‍ വിട്ടുനിന്നെന്നാണ് വിവരങ്ങള്‍.

കേരളത്തില്‍ വെച്ച് നടക്കുന്ന സിപിഐഎം കേന്ദ്രകമ്മിറ്റിയില്‍ ഇപിയുടെ നടപടികള്‍ ചര്‍ച്ച ചെയ്യുമെന്നാണ് അറിയുന്നത്. അതേസമയം പുതിയ മന്ത്രിയായ മണിയെ അഭിന്ദിച്ച് ജയരാജന്‍ ഫേസ്ബുക്ക് പോസ്റ്റിട്ടിരുന്നു.